Су тасқыны: Сең мен селге дайындық қалай?
Жаңа жылдағы үкіметтің алғашқы отырысында нақты істер арқылы халықтың әлауқатын арттыруға бағытталған жобаларды талқылады. Әсіресе ҚР Премьер-министрі Әлихан Смайылов Үкімет отырысында Қазақстандағы қазіргі санитарлық эпидемиологиялық ахуалды талқылап, тұрақтандыруға күш салуды тапсырды.
Денсаулық сақтау министрі Ажар Ғинияттың айтуынша, 2023 жылдың қорытындысымен жұқпалы аурулардың эпидемиологиялық ахуалы тұрақты болды. Алдын алу шараларының арқасында оба, тырысқақ, полиомиелит сияқты 20-дан астам қауіпті жұқпалы ауру тіркелген жоқ. Сондай-ақ коронавирус, ротавирус және жіті ішек инфекциялары бойынша сырқаттанушылық төмендеді. Жыл соңында елде 29 мыңнан астам қызылша жұқтыру дерегі тіркелді, оның 80%-ы 14 жасқа дейінгі балаларға тиесілі. Осыған байланысты Әлихан Смайылов қызылшаға қарсы, басқа да профилактикалық екпелерді салу жұмыстарын күшейтуді тапсырды. Сонымен қатар денсаулық сақтау министрінің сөзінше коронавирус инфекциясының таралуы жыл бойы жүреді, халық өз денсаулығына жауапкершілікпен қарау керек.
– Біз оны ай сайын тіркеп, бақылап отырмыз. Коронавирус жұқтыру фондық (фоновые) аурулары бар адамдарға қиынға түседі. Бұл – негізінен қарттар. Одан бөлек созылмалы ауруы бар науқастар, әсіресе тыныс алу және жүрекқан тамырлары дертіне шалдыққандарға да оңайға соқпайды. Осы орайда біз жоғарыда аталған қатардағы азаматтарға ревакцинациядан өтуді ұсынамыз», – деді Ажар Ғиният Үкімет отырысынан кейін өткен баспасөз мәслихатында. Оның айтуынша, өткен жылы 350 мың азамат COVID-19 инфекциясына қарсы екпе алған. Сондай-ақ министр «қазақстандықтар қайта маска таға ма?» деген сауалға жауап берді. «Біз маска тағуды ұсынамыз. ЖРВИ маусымы қалай басталады, яғни қазан-мамыр айлары аралығында бас санитарлық дәрігердің қаулысымен маска кию ұсынылады. Сонымен қатар медициналық ұйымдарда да маска режимі енгізіледі. Маскаға қатысты тағы бір нақтылағым келеді, біз тек ұсынамыз», - деп толықтырды ведомство басшысы.
«Бүгінгі отырыста Үкімет басшысы елдегі санитарлық-эпидемиологиялық ахуалға қатысты бірқатар өзекті мәселелерді көтерді. Оның ішінде аса қауіпті және жұқпалы аурулардың алдын алу жұмыстарын жүйелі әрі сапалы жүргізуді тапсырды. Өңірімізде коронавирус инфекциясы 2022 жылдың есепті кезеңімен салыстырғанда 55 есе төмендеген. Алайда өткен жылы қызылша ауруының 1 682 жағдайы тіркелді. Эпидемиологиялық ахуалды тұрақтандыру үшін Бас мемлекеттік санитарлық дәрігердің қаулысына сәйкес қараша айынан бастап қызылшаға қарсы жаппай иммундау шарасы өтті. Қазір облыста эпидемиологиялық жағдай тұрақты», – деді аймақ басшысы.
Төтенше жағдайлар министрі Сырым Шәріпханов, бірқатар өңір әкімдері, сондай-ақ Қызылорда облысының әкімі Нұрлыбек Нәлібаев су тасқынына әзірлік туралы хабарлама жасады.
– Су ресурстары және ирригация, Экология және табиғи ресурстар, Төтенше жағдайлар министрліктерімен бірлесіп, су тасқынының алдын алу үшін барлық шаралар қабылдануда. Өзен арнасына күнделікті бақылау жүргізілуде. Қауіпті учаскелерге арнайы техникалары бар жауапты мекемелер бекітіліп, қажетті материалдық-техникалық қор толықтай жасақталды. Су шаруашылығы жағдайы тұрақты бақылауда, – деді аймақ басшысы.
Облыс әкімінің мәжілісінен кейін аудан әкімі Мұрат Жолкелдіұлы автив жиналысын өткізіп, нақты мәселелердің шешу жолдарын талқылады.
– Әріптестер өткен жылды ойдағыдай аяқтап, жаңа жылды жаңа бастамалармен бастауға кірісуіміз керек. Адалдық – адамгершілік парасаттың ең биік шыңы. Ол кез-келген істе, әрекетте, сөзде өзінің пендешілік мүддесінен адамшылық мүддесін жоғары қоя білуді білдіреді. «Адамдықтың нұры бол, тәртіптің құлы бол» дейді үлкендер, адам баласы ақиқатты ардақ тұтып, қай істе болмасын темірдей тәртіп болуы керек.. Ең бастысы – қай ауылда болмасын тәртіп болса, сол ауылда жұмыс жүреді, табысқа да қол жетеді. Демек, халықпен тығыз байланыста жұмыс істеген дұрыс. Бұл ретте өзге ауылдан қатынап жұмыс жасайтын ауыл әкімдері өзінің жұмыс істейтін жеріне көшіп бару керек. Тәртіп болмаған жерде жұмыс болмайды. Ауыл инспекторларына апта сайын ауылдарды аралап, әкімдік қызметкерлерінің жұмыста бар-жоғын зерделеп, жүйелі жұмыс жасауды тапсырамын. Сондай-ақ, қызметтік көлікті демалыс күндері мінуге, жеке басына пайдалануға болмайды, осыны ескеріңіздер. Жеке бастың емес, ауыл тұрғындары мен қарапайым халықтың жағдайын жасауымыз керек. Ауыл әкімдері – халық пен биліктің дәнекері. Елдің арасында жоғары жақта отырғандар білмейтін небір мәселелер бар. Соларды өз деңгейінде жеткізу әрі мәселені шешу міндеті тұр. Ауыл әкімдері мен бөлім басшылары ауа-райын алдын ала болжап, қажетті шараларды қолданып, қауіпсіздікті ұдайы пысықтап отыру керек, – деп тиісті сала мамандарына қатаң тапсырмалар берді.
– Соңғы уақыттары су тапшылығы қатты сезілуде, оны өздеріңіз жақсы білесіздер. Ауыл әкімдері өзінің қарамағындағы шаруаларға егінді аз қажет ететін дәнді-дақылдарды егуін қадағаласа. Оның үстіне, күріштің суаратын уақытында көпшілігі жоңышқаны да бірге суарып, айтарлықтай қиындық туындайды. Шаруалар осы кезде уақытты тиімді пайдаланып, жоңышқаны ретімен суарып алса, ертеңгі күні күрішпен қабаттаспайды. Әрі диқандар тамшылатып суарудың көлемін арттырып, көкөніс, бақша дақылдарын өңдеуге мән беретін кез келді. Ауыл шаруашылығы – экономиканың негізгі тірегі. Бұл сала мемлекеттің қолдауына ие. Ал, егінді әртараптандыру бүгінгі күннің өзекті мәселесі әрі осы бағытта ізденіп, егінді әртараптандыру маңызды. Осыны ескеріңіздер, – деп ұсынысын жеткізді.
Әсел РЗАЕВА
