Сыбайлас жемқорлық – қоғам қасіреті
![](/uploads/posts/2023-10/medium/1697295719_zhemorly.jpg)
Жемқорлық – қазіргі таңда әлем назарын өзіне аударған қауіпті және өзекті мәселелердің бірі. Кез-келген өркениетті қоғам үшін сыбайлас жемқорлықпен күрес кезек күттірмейтін міндет. Өйткені ол сан күрмеулі әрі оның зардабы ұлттық қауіпсіздікке қауіп-қатер әкелетіндігі күмәнсіз. Сонымен қатар елдің әлеуметтік-экономикалық дамуына айтарлықтай қауіп төндіретін құбылыс десек артық болмас. Тәуелсіздік алған уақыттан бері түрлі бағдарламалар қабылданып, жүйелі жұмыс жүргізіліп келеді. Бірақ әлі күнге дейін нәтиже жоқ.
«Дүние – байлық неге керек, денсаулығың болмаса, төрелігің неге керек, халықтың көңілі толмаса» деген нақыл сөздің астарында терең мағына бар әрі бұл нақыл елім деп қызмет етіп жүрген азаматтардың басты бағдары іспеттес. Өйткені сыбайлас жемқорлық – заманмен бірге өсіп, небір тегеурінді қарсылықтарға қарамастан, қайда көп қаражат, пайда болса, сол жерге тамыр жайып, бүгінге дейін жойылмай отырған кеселдің бірі. Әлбетте, бұл біздің елімізде ғана емес, жаһан жұртының алдында тұрған әлеуметтік қасірет. Қарап отырсақ, бұл ықылым заманнан бері өз шенін жоғарылату, ешбір қиындықсыз кез-келген нәрседен өтіп кету, қалаған жұмысқа орналасу, қызметте өсу және болғанды болмағандай етіп шығару секілді көзбояушылық жемқорлықтың әрекеті.
Бұрын «жемқорлық», «пара», «сыбайлас» деген сөздерді естігенде құлағымыз елең ете қалатын еді, алайда, қазір оған етіміз үйреніп кеткендей. Адамдар осындай жайттарды көре тұра бір-біріне сенімсіздікпен, күдікпен қарайды. Кішкене қиындыққа тап бола қалсақ, ауырдың үстімен, жеңілдің астымен өткіміз келетіні ащы да болса шындық. Әйтсе де, соңғы уақыттары бұл дертпен қоғам болып күресіп жатқанымыз белгілі. Мемлекет басшысы Қасым-Жомарт Тоқаев халыққа арнаған Жолдауында: «Сыбайлас жемқорлық қоғамға, мемлекеттің конституциялық негізіне қауіп төндіреді, онымен күрес жүргізу – жалпы ұлттық міндет», – деген болатын.
Қоғам дамуының жаңа жолын таңдап, жас мемлекетіміздің буынын берік ұстаймыз десек, уақыттан туындаған түрлі кеселдерден айығуды міндетті күн тәртібіне айналдырғанымыз жөн.
«Тура биде туған жоқ, туғанды биде иман жоқ» дегендей, қара қылды қақ жарып, турасын айтып, әділдікке жүгінген халықтың ұрпағы бүгінгідей өз алдына ел болған, еңсесі биік отыз мемлекеттің қатарына жетуді көздеп отырған шақта парасат биігінен көрінуге тиіспіз.
Жалпы сыбайлас жемқорлыққа қарсы күрес жеке адамдардың немесе жекелеген топтың ғана емес, жоғарыда айтқанымдай, мемлекеттік органдарда қызмет жасайтын қызметкерлердің, тіпті тәуелсіз елдің әрбір азаматының парызы деп түсінгеніміз жөн. Осыны шынайы орындау үшін әрбір лауазым иесі, тіпті әрбір қазақстандық азамат өзінің жан-дүниесін ұдайы таза әрі адал ұстауы тиіс. сонда ғана олар қоғамның сенімін ақтап, ел экономикасының дамуына үлес қосқан болар еді.
Біздің қоғамда сыбайлас жемқорлыққа орын жоқ. Қоғамның барлық күш-жігерін біріктіріп, осы дерттің одан әрі ушықпауы үшін оны тоқтатудың барлық амалдарын қолдану арқылы ғана бұл құбылысқа тиімді түрде қарсы тұруға болады.
У.Жамурова,
Жаңақорған аудандық қазынашылық
басқармасының бас маманы,
бас қазынашысы