Жас кәсіпкер екі мыңыншы жыл­дары аудандағы «Мерей» және «Жігер» акционерлік қоғамына біріккен авто­транспорт кәсіпорнын мемлекет қара­мағынан жекеге сатып алып, жолаушылар тасымалымен айналыса бастайды.
Алғашында 11 бағытта жолаушылар маршруты ескі автокөліктермен атқа­рылса, 2004 жылдары «Вираж Лизинг» автосалонымен тікелей байланыс жасап, су жаңа 16 автокөлік қатарға қосылды. 2007 жылы Германияның «Спринтер» автокөліктері сатып алынды. Бүгінде Жаңақорғаннан Түркістан және Қызылорда қалаларына қатынайтын және ауылішілік маршрут бойынша 50 орындық 6 автобус және 20-ға жуық «Спринтер», «Газель» автокөлігі жұмыс істеуде. Қалааралық және ауыл аралық жолаушылар көлік­терінің жоғары сапалы қызметін қамтамасыз етуді мекеме басшысы қатаң назарда ұстап келеді. Оның бұл талапшылдығын білетін жүргізушілер көлік бұзыла қалған жағдайда оны толық жөндеп, тазалап, келесі рейс­ке сақадай-сай тапсырып кетуге әбден дағдыланған. Ақау болған жерді өзі тауып беріп, қашан түйткіл шешілмейінше іс басынан кетпейтін құнтты басшының тәртібіне терең төселгендіктен болар жұмыс бабында түрлі сылтау-себепке жол берілген емес. Басшының өз кәсібінің білгір ма­маны болуының артықшылығы сон­да, қарамағындағылармен еңбек қатынасында кінәратсыз талап тағы­нан таймайды, бұл айналып келгенде биік сапаны орнықтырады.
2010 жылдары мекеме басшысы орталықтағы автовокзал үйін жаңадан тұрғызуды қолға алып, екі қабатты сәулетті ғимарат салынып, кенттің айнасы саналар алаңқай ретке келтірілді. Автотұрақ алаңына жағалай орныққан «жабайы базар» ретке келтіріліп, жолаушылар мүддесіне аса қажет сауда орындары белгіленген ережеде мәдени қызметке бейімделді. Кәсіпкер азамат бұдан бөлек аудан халқының игілігіне 600 орындық «Орда» мейрамханасын пайдалануға берді. «Мақсат», «Сезім» кафелері тұрғындарға қызмет жасап тұр. Сол сияқты орталықтағы «Казпошта» меке­месі жанынан соғылған екі қабатты еңселі сауда үйі көріктігімен көз тар­тады.
Үлкен жүректі азамат осының бар­лығын үндемей жүріп атқарды. Артық сөзге жоқ істің адамы атқарған ісімен майын тамызып мақтанғанды да білген емес. Зәуіде жиын тойда сөз тиіп, микрофон қолына тисе оның «маған тост сөйлегеннен гөрі тойхана салып берген оңай» деп құтылатын уәжінен жан мөлдірлігі танылып тұрады.
Игіліктің қандайын да адамдық капиталды игілікке жұмылдыра білу, яғни жұмыла кіріскен ынтымақты тірлік шешеді. Қанша көп болса да жұмысты қаржы емес адам атқарады. Ең бастысы, қарамағындағылардың көңіл-күйі, ертеңге деген сенімі орнықты болмайынша істе береке болмайды.
Әбдіхан ағамыз бұл заңдылықты көңіл таразысынан ешуақытта тыс қалдырған емес, Бейнетіне төзіп, жұмысын беріле атқарғанды бауы­ры­нан да артық көріп жалақыдан бөлек бір атаулы күндерде көңілінің кең жайлауынан төгілген тосын тартумен таң қалдырар дағдысы да бар. Бұл да еңбегі адалдық ақысы. Маңдай тердің өтелгені.
Арлы адамның жазмышына алаң­сыз тыныш өмір сүру жазылмаған. Әбе­кеңнің де әуелі әулеттің қамы, мұң-мұқтажынан мойны ешуақытта босаған емес. «Өзің өлтірмес, жат жарыл­қамасты» жаттап алған жақын­дарына жағдай жасау өз алдына, қолын­дағы барды айналамен бөлісіп, жалпы әлеуметке, елдегі жағдайы төмен отбасыларына жәрдем көрсетуді жалғастырып келе жатқан меценат аға жоқ-жітікке қолы қысқаларға қарасуды ешуақытта қаперден шығарған емес. Әртүрлі жағдайларда қарауындағы автокөліктерді мұқтаждарға тегін тұтынуына кеңдік танытып жүреді. Қалтасы қалың азаматтарымыздың осындай ғажайып табиғатымен жақ­сылық атаулыға жан бітіріп, қоғам­ды жасампаздыққа жетелеуге күш-қайратының жеткені қандай жарасымды. Бұдан олардың табысы кеміп қалмайды. Қайта тілектестер қатары артып, берген зекеті мен садақасының сауабымен берекеті толыға түсері кәміл. Ел халқының әлеуметтік хал-ахуалына тірек болып, көп жерде түйткілдің тарқатылуына тұғырлы талабымен тұтқа болып жүрген кәсіпкер азамат елдің саяси өмірінен де сырт қалған емес. Жақында ғана «Нұр Отан» партиясының аудан­дық өкілдігіне өз атынан үш жарым милион теңгеге қызметтік көлік тарту еткені соның дәлелі.
Еңбекқорлығы мен іздегіштігін ту етіп, жанын жалдап жұмыс істеуден жалықпайтын, болдым-толдым деп босаңсымай, табиғат берген қабілетінің арқасында ағайынның бірлігі, туған жердің тірлігіне жарап келе жатқан жаны асыл ағаның алдағы уақытта «Ауданның Құрметті азаматына» лайық қызметі көп көкейінен тек қол­дау табарына сеніміміз нық.