«ӨЛЕҢ – СӨЗДІҢ ПАТШАСЫ, СӨЗ САРАСЫ»
Абайдың 175 жылдығына орай басталған жыр эстафетасының географиясы кеңіп, халықаралық кеңістікте кең тарап жатыр. Тақтағы патшадан таяқ мінген балаға дейін дана Абайдың сөзін жатқа оқып, эстафетаға үн қосып, ұлықтап жатыр. Әрине, осы бастама арқылы дүйім жұрт ақынның шығармашылығына сусындап, бірі өлеңдерін жаттауға асықса, енді бірі кітап бетін парақтады.
Осы тұста, көршілес Шиелі аудандық «Өскен өңір» газеті редакциясы басылым бетінде Абай жырларын айшықтап, «Жаңақорған тынысы» газетінде жалғастыруға жолдаған болатын. Өз кезегінде біз «Өскен өңір» газетінен қабылдап алып, Абайдың «Өлең – сөздің патшасы, сөз сарасы» өлеңінен үзінді келтіріп, Арал аудандық «Толқын» газеті редакциясына жолдаймыз.
Өлең – сөздің патшасы, сөз сарасы,
Қиыннан қиыстырар ер данасы.
Тілге жеңіл, жүрекке жылы тиіп,
Теп-тегіс жұмыр келсін айналасы.
Бөтен сөзбен былғанса сөз арасы,
Ол - ақынның білімсіз бишарасы.
Айтушы мен тыңдаушы көбі надан,
Бұл жұрттың сөз танымас бір парасы.
Әуелі хаят, хәдис – сөздің басы,
Қосарлы бәйітмысал келді арасы.
Қисынымен қызықты болмаса сөз,
Неге айтсын пайғамбар мен оны алласы.
Мешіттің құтпа оқыған ғұламасы,
Мүнәжәт уәлилердің зар наласы.
Бір сөзін бір сөзіне қиыстырар,
Әрбірі келгенінше өз шамасы.
Өлеңге әркімнің-ақ бар таласы,
Сонда да солардың бар таңдамасы.
Іші алтын, сырты күміс сөз жақсысын
Қазақтың келістірер қай баласы?
Бұрынғы ескі биді тұрсам барлап,
Мақалдап айтады екен, сөз қосарлап.
Ақындары ақылсыз, надан келіп,
Көр-жерді өлең қыпты жоқтан қармап.
Қобыз бен домбыра алып топта сарнап,
Мақтау өлең айтыпты әркімге арнап.
Әр елден өлеңменен қайыр тілеп,
Кетірген сөз қадірін жұртты шарлап.
Қобыз бен домбыра алып топта сарнап,
Мақтау өлең айтыпты әркімге арнап.
Әр елден өлеңменен қайыр тілеп,
Кетірген сөз қадірін жұртты шарлап.
Мал үшін тілін безеп, жанын жалдап,
Мал сұрап біреуді алдап, біреуді арбап.
Жат елде қайыршылық қылып жүріп,
Өз елін бай деп мақтар құдай қарғап.
