Оған бүкіл адамзат қауымы қарыздар. Оны қалай ардақтап, мәртебесін көтерсең де сол мадаққа лайықты жан. Ұстаз алдында әлемнің әміршісі атанған Ескендір Зұлхарнай да басын иген, оның бір ауыз сөзін тәрк етпеген. Жаңақорған аграрлық-техникалық колледжінің №92 «Автокөліктерге техникалық қызмет көрсету және пайдалану» тобы студенттері де осынау мерекені ұлықтады.
Білім ошағының акт залы безендіріліп, әсем әуен залдағы тыңдармандардың жүрегін шымырлатып, бір сәт тына қалды. Зал тік тұрып ішке еніп келе жатқан ұстаздарын қуана қол соғып қарсы алды. Бүгін мұнда колледж студенттері өздерінің қазіргі ұстаздарымен қатар зейнеттегі қарт ұстаздарды да шақырыпты.
Ұстаздар және қарттар күніне байланысты өткізілген бұл шараның тек эстетикалық, танымдық мәні ғана емес тәрбиелік те маңызы басым болғанын атап өткен жөн. Студенттер тек ән шырқап, би билеп қана қоймай, қазіргі қоғамдағы бала мен ата-ана арасындағы қайшылықтарды шағын қойылым арқылы нанымды көрсетуі ешкімді де бей-жай қалдырмады.
Оны кейбір қариялардың көз жанарындағы мұңлы ойдан байқағандаймыз. Тек бір Алла тәрбиесіз ұл мен қыздан сақтасын.
Шара соңында сахна төріне көтерілген колледж директоры Мадияр Ахметов барша ұстаздар мен қарттарды төл мерекелерімен құттықтай келе, оларға зор денсаулық, отбасыларына амандық тілеп, соңынан бір топ ұстаздарға марапат жасады. Марапатталғандар ішінде; Қазақстан Республикасы Білім және Ғылым Министрінің Құрмет грамотасымен өндірістік оқу шебері Оразәлі Асанов, облыс әкімінің Алғыс хатымен арнаулы пән мұғалімі Марат Мұсабаев, ағылшын пәнінің мұғалимасы Бейсенкүл Сейілова «Білім беру ісінің үздігі» төсбелгісімен, Ғалым Мампаев облыс әкімінің Дипломымен, Мейрамбек Есжігітов – «Білім беру ісінің үздігі», Қарлығаш Алпамышева «Үздік жас маман» номинациясы бойынша жеңімпаз атанса, облыстық білім басқармасының Құрмет грамотасымен Талғат Шарап, Бауыржан Әділбеков және Алғыс хатымен Ақтоты Назарымбетова мен Жанар Сопыбекова марапатталды.
Келесі кезекте Мадияр Ахметұлы арнайы пән оқытушысы Қатира Нұрымбетова мен техникалық қызметкер Тұрсынбек Ақбаевты зейнет жасына толуымен құттықтап олардың иықтарына шапан мен қамзол жауып, зейнет демалысына шығарып салып, соңынан колледж ардагерлеріне сый-сияпат жасап оларға тек жақсылық тіледі.
Шара барысында колледж ардагерлері Зияудин қажы Әбілхайыров пен Жұпаш Мақұлбекова өздеріне көрсетілген құрмет үшін колледж басшылығы мен көтеріңкі көңіл-күй сыйлаған шәкірттерге ризашылығын білдірді.
Ерубай ҚАЛДЫБЕК.

#Жаңақорған #Ұстаз