Бексұлтан кітаппен дос
«Құймақұлақ бол, балам!». Ескіден қалған есті сөз. Мағынасына мән берсеңіз жолын жалға дегенге саяды. Міне, осындай сөзді естіп өскен Бексұлтанның құймақұлақ қасиеті бар. Бір айтқанды жаттап алады. Олай болмаса, 3 сыныптың оқушысы қалайша Абайдың «Ескендір» поэмасын жаттап алады.
Сазгер, орындаушы Бексұлтан Байкенжеевтей халықтың сүйікті ұлы болсын деген ниетпен атасы Жанболат шөбересіне «Бексұлтан» деп азан шақырып, ат қояды. Осы үкілі үміт нұрлы сәулесіне айналып келе жатқан Бексұлтанның алғашқы қадамдары қуантады. №163 мектептің 3 сыныбыныда оқитын оны қатарластарынан ерекшелейтін қасиеті оның тым-тым зеректігінде жатса керек.
Көркемсөз оқу өнеріне баулыған ұстазы Мариям Батырбекова Бексұлтанның талабын байқап, зейінін ашты. «Бексұлтанның ерекше дарынын байқап, биыл алғаш рет додаға қатысты. «ARNAU» халықаралық шығармашылық орталығы ұйымдастырған «Абай – дана, Абай – дара қазақта» атты байқауына қатысып, мектептің абыройын асырды. Алғашқы жетістігінен-ақ, таудай талабы барын аңғартты», – деді Мариям Батырбекова. Биылдан бастап сынып жетекшілікті қолға алған Гүлдана Ахметова Бексұлтанның бағындырар белесі алда деп үміттенеді.
Бексұлтан үлкен азаматтай сөз саптап, терең ой қозғап, даралығын танытып жүреді. Өмірді тануға деген көзқарасы кемел. Бұл баланың кітапты көп оқитынын білдірсе керек-ті. Орталық кітапхананың балалар бөліміндегі көп кітапты парақтап, керекті тұсынан жадына тоқығаны көп. Әсіресе батырлар туралы аңыздарды білетіні көп.
«Әкеге қарап ұл өсер, шешеге қарап қыз өсер» дегендей, әкесі Ерсұлтан Жанболат та сөз өнерінен алыс емес. Өлең жазып, көп кітап оқиды. Әкесінен көрген көркем дағдыны ұлы қайталап, зерек те зейінді қасиетімен ерекшеленіп келеді.
– Ұлымның өмірді тануға деген ниеті қуантады. Менімен бірге кітап оқиды. Осыны аңғарып балалардың дүниетанымына сай кітаптарды арнайы сатып аламын. Карантин кезінде Абайдың өлеңдерін жаттауды бастады. Қазір ақынның оннан аса өлеңін жатқа біледі. Сосын «Ескендір» поэмасын жаттауға бел шештік. Алғашында көлемін көріп, жүрексінгені бар. Шешінген судан тайынбас дегендей кірісіп кеттік. Бірнеше аптада поэманы жаттап алды, – деді әкесі әңгімесінде.
Бексұлтан 42 шумақтан тұратын «Ескендір» поэмасын жатқа айтып, әлеуметтік желіде елдің назарын аударғаны бар. Елдің бәрі «жас талант екен, бүтін поэманы қалай жаттап алған?» деп таңырқағаны жөнінде пікірлері бар. Өлең жаттауда қандай тәсілге жүгінеді? Бұл жайында анасы Жұлдыз Жанабиловадан сұрадық.
– Жолдасым үйде үнемі домбыра шертіп, шығарған өлеңдерін оқып, бізді марқайтып жүреді ғой. Бексұлтан 4 жасында әкесіне еліктеп, домбыраны қағып, әуенге қосылып, ыңылдап ән салатын қылықты шығарды. Осы кезден бастап, оның дарынын байқап, тақпақтар мен өлеңдер үйрете бастадық, – деді анасы.
Бексұлтан 6 жасынан мектепке барды. Ата-анасы «сабақты алып кете ала ма?» деп уайымдаған еді. Бірақ дарынды бала ортаға тез бейімделіп, жақсы қырларын көрсетіп, белсендіклік танытты. Бүгінде Әлшекей атындағы өнер мектебінің домбыра сыныбында дәріс алады.
Алғашқы қадамынан болашағынан үлкен үміт күттіретін жасөспірім Бексұлтан Жанболат: «Абай өлеңдері менің жүрегіме жақын. Сондықтан оның өлеңдерін тез жаттаймын, – деді.
Бексұлтаннан бас ақынның өлеңдерін оқып беруді сұрадық. Ол расында жүйрік екен. Іркілместен «Ғылым таппай мақтанба», «Жасымда ғылым бар деп ескермедім», «Білімдіден шыққан сөз», «Жүректе қайрат болмаса», «Жігіттер, ойын арзан, күлкі қымбат» өлеңін бірінен кейін бірін нақышына келтіріп оқып берді.
«Мерейлі отбасы» ұлттық конкурсының облыстық байқауында екінші орын иеленген отбасының талапты өспірімнің талпынысын көріп, көңіліміз қуанды. Бүгінде жасөспірімдер планшет пен смартфонға үңілген уақытта біздің кейіпкеріміз кітапты қолға алып, өзінің озық ойымен даралана бастады. Осы бағыттан таймаса елдің тұтқасын ұстар ойлы азаматтың бірі болары анық...
Мақпал МАРҚАБАЙ
