«Саяжай» аумағындағы №7 көше бойында кісі қарасы көп жиналыпты. Ондағы мақсат – Тобат Құлымбетовтың есімін ұлықтау.

Шарада алғы сөз алған аудан әкімінің орынбасары Ғалымжан Сопбеков:

   – Жалпы, соңғы жылдары аудан орталығының аумағы кеңейіп, жаңадан көшелер түзілуде. Осы көшелерге мемлекеттік мүдде жолында қызмет еткен тұлғалардың есімін беруді басшылыққа алып келеміз. Сондай ардақты азаматтың бірі – Тобат Құлымбетов еді... – деді.

Кезекті сөз алған полиция ардагері Әлібек Сүгірбаев, Еркін Мұсаев, Жасұзақ Аманбаев, еңбек ардагері Зинабдин Шермағанбетов, Шайдарбек қажы Әшімов пен Жанар Тобатқызы қырық жылға жуық қоғамның тыныштығын қорыған азамат жайлы естеліктерімен бөлісті.

Ол Кеңес әскері қатарында борышын атқарып келгеннен кейін ішкі істер органына қызметке тұрады. Құқық қорғау саласы қызметшісі ретінде адамдықты, адалдықты бәрінен биік қойды. Оның азаматтық ұстанымын халық құрметтейтін.

Жаңақорған кентінің әкімі Әбунасыр Бекішов тыл және полиция (милиция) ардагері Тобат Құлымбетовке №7 көше атын беру туралы шешімін оқыды.

          Ауданның бас имамы Сейдулла қажы Омаров марқұмның әруағына Құран бағыштады.

Одан кейін Зинабдин Шермағанбетов, Сейдулла қажы Омаров, Жасұзақ Аманбаев көше аты жазылған белгі лентасын қиды.