Қазақстан Республикасының Денсаулық сақтау министрі Елжан Біртанов Алматыдағы Орталық референс-зертхананың қызметі мен менингиттен болған өлімнің  арасындағы байланысты жоққа шығарды.Бұл туралы Sputnik Қазақстан-ға сілтеп, Stan.kz ақпараттық агенттігі хабарлайды.
Біртанов Алматыдағы орталық референс-зертханасының Қазақ Зооноздық инфекциялар институтының базасында жұмыс істейтінін айтты. Бұл ғылыми орталық көптеген онжылдықтар бойы жұмыс істеп келеді. Сондай-ақ, онда осы уақыт аралығында Қазақстан аумағында таралу қаупі бар ерекше қауіпті инфекциялардың штаммдары сақталған.
«Шынында да, америкалық әріптестердің көмегімен ең жоғары қауіпсіздік санаттағы заманауи зертхана  салынды. Енді бұл штамдар қауіпсіз жерде сақталады. Менингит штаммдарына келетін болсақ, бұл халық арасында күнделікті тарайтын штамм болып табылады. Олар бұл зертханада сақталуы тиіс ерекше қауіпті санаттағы ауру болып саналмайды. Бұл референс-зертхананың аурудың пайда болуына қатысы болатындай жағдай жоқ», – деді Біртанов дүйсенбідегі баспасөз мәслихатында.
Оның айтуынша, менингит дертіне қатысты 58 оқиғаның ең көп саны, яғни 32-сі Алматыда тіркелген. Ақмола облысында 2, Ақтөбеде – 3, Алматы облысында – 4, Шығыс Қазақстан облысында – 4, Жамбылда – 1, Қарағандыда – 1, Қызылордада – 1, Павлодарда – 2, Оңтүстік Қазақстан облысында – 4, Астанада – 4.
«Қауіп барлық жерде және барлық өңірлерде бар. Бүгінде Алматыда халық саны көп болағандықтан, сәйкесінше аурудың таралу ықтималдығы жоғарырақ. Демек, ауырып қалу қаупі жоғары», – деді министр.
Инфекцияның ерекшелігі – адам өзі ауырмай-ақ, ауруды тасымалдаушы болуы мүмкін. Ол бұл туралы білместен басқа адамдарға жұқтыруы мүмкін. Бұған қоса, инфекция жылдам тарап, тез өлімге әкелуі ықтимал, деді Біртанов.
Бүгінгі таңда Қазақстанда 12 адам менингиттен көз жұмды.