Қазақ – дарынды ұлт. Оған әлем бойынша ең данышпан балалардың рейтингісінде Әли Байжігіттің көш басынан орын алуы дәлел бола алады. Ол – математиканың сан саласын білетін, күрмеуі қиын есептің кез-келгенін шешетін өте зерек бала. Небәрі 11 жасында Ресейдің «Лучше всех» бағдарламасының қонағы болып, 20 секундта 30 есеп шығарған, «Pentiums87» операциясына қол жеткізген ең жылдам математик. Иә, осындай өнерімен күллі әлемді мойындатып жүрген таланттың қазақ баласы болғаны қуантады. Оған қоса, вундеркинд балалар қатарында 12 жасынан ең жас проссмейстер атанған шахматшы Жансая Әбдімәлік, 12 жасында ЖОО орнына түскен Абзал Мырзаш, Лас-Вегаста өткен «Memorial-2016» халықаралық зияткерлік олимпиадасының жеңімпазы Мәди Ердәулет, 7 жасында үш бірдей кітабы басылып шыққан жас ақын Жамбыл Дүйсеновтер бар.

Болар бала бесіктен

Бұл тұста біздің де мақтана айтар жас өрендеріміз баршылық. Облыстық, республикалық түрлі додаларда аудан абыройын асқақтатып, жеңіс тұғырынан көрініп жүрген жас бүлдіршіндер қатарына Айлин Сәбитті де қосуға болады. Ол – менталды арифметиканы меңгерген, үш тілде шабыттана қара өлең оқитын, өте жылдам, абстрактілі ойлау қабілетіне ие.

Алты жасар ақылды қыз биыл «Жұбаныш-А» балабақшасынан түлеп ұшады. Үш жыл бойы қазақ, орыс, ағылшын алфавитін меңгерген жас талант қандай қиын есеп болса да, санаулы секундта ойлау мен саусақты қимылдату арқылы шешіп береді. Бүгінде алты жасар баланың қабілеті 10 жастағы жеткіншекпен бірдей. «Әліппе», «Сауат ашу», «Ана тілі», «Орыс тілі», «Ағылшын грамматикасы» сынды іліммен балабақшадан-ақ таныс болған дарындының мінезінен өжеттікті, ашықтықты байқадық. Яғни, психологиялық ойлау жүйесі мен жан-жақтылығы ерте дамыған.

–Айлин кішкентайынан зерек, зейінді болды. Ал, егізінің сыңары Раян оған қарағанда баяулау, момын бала болып өсті. Айлиннің жүрісі де, сөйлеуі де ерте дамыды. Оның ерекше қабілетін аңғарған соң, білікті балақшаға бердік. Нәтижесі, керемет. Қызымның деңгейі 3 сыныпты бітірген оқушыдан да жоғары деуге болады. Ендігі мақсат – дарынын шыңға жетелейтін озық білім ордасына беру, – дейді әжесі Қаракөз Қалқозова.

Қасиет – ана мен әкеден, ата тектен берілетін анық. Бір қызығы, Айлиннің атасы мен әкесі де математик болған. Әкесі Жасұлан Қалбергенов бүгінде алматылық фирмада «бухгалтерлік» жауапты қызмет атқаруда. Ал, немересін бауырына басып, өз қамқорлығына алған әжесі баланың ойлау жүйесінің жылдамдығын таныған соң, менталды арифметика курсына берген.