Барды бағалай білейік!
Абыз Әбіш Кекілбаевтан «Бағалай білмегенге бақ қонбайды, Қуана білмегенге құт қонбайды» деген тағылым қалды. Терең сөз. Мұның мәнін түсінген ұлт – бақытты ұлт. Мұны неге айтып отырмын? Кейде жақсы-жайсандарымызды уақытында бағалай алмай, артынан іздеп, жоқтап жататынымыз рас. Тіпті бұл біздің қанымызға сіңген қасиет сынды көрінеді.
...2015-2016 жылы Жаңақорған ауданының әкімі, 2016-2019 жылы Қызылорда облысы әкімінің орынбасары, 2019-2020 жылы Сырдария ауданының әкімі болған Руслан Рүстемовті халық өнер, мәдениет саласының шынайы жанашыры ретінде қабылдайды һәм құрметтейді. Халықтың осындай құрмет-қошеметінен артық ешнәрсе жоқ болар, сірә! 2020 жылы Жаңақорған ауданының тізгінін қайта ұстаған Руслан Рүстемұлын халық ыстық ықыласпен қабылдады. Бүгінде бастаған бастамаларын қолдап, жүзеге асуына мүдделілік танытуда. Осы ретте, мәдениет жанарышы болғандықтан бірқатар ұсыныс-тілегімізді ортаға салғанның әбестігі жоқ болар...
Жаңақорған ауданының тарихында Әбілқайыр Сыздықовтың өзіндік ізі бар. Кейде ақын адамдар турашылдығы үшін бағаланбай жататыны шындық.
Әрине ақынға қызметтен бұрын шабытына шабыт қосатын қолдаулар керек-ақ. Яғни рухани қолдау жағына басымдық берілгенін құптаймыз. Мәселен, Сырдария ауданының айтыскер ақыны Замаддин Ибадуллаевтың өзі туып-өскен ауданның «Құрметті азаматы» атанғанын қуанып, жақсы қабылдадық. Әрі мұны мемлекеттік мүдде жолындағы дұрыс шешім деп қабылдап, Руслан Рүстемұлының азаматтық қолдауына сүйсіндік. Біздің Әбекеңде де осындай марапатқа әбден лайықты-ақ!
1992-2013 жылдары Әбекең мәдениет саласында түрлі қызметтер атқарып, аудан мәдениетінің дамуына үлес қосты. «Халық ақыны» Манап Көкеновтің дәстүрлі ақындар мектебін жалғастырып, «Жүрсіннің жүйріктерінің» қатарында аламан айтысқа түсіп, дарынды ақын ретінде елге танылды.
Журналист ретінде ақын шығармашылығын зерттеп те жүрмін. Оның әрбір өлеңінің тәлімдік тағылымын талдасақ үлкен мақалаға арқау болатыны да анық. Ақынның «Мен қазақпын», «Тәуелсіздік толғауы», «Туған өлке», «Рухани жаңғыру жолымен», «Қорқыт кешені басындағы кездесу», «Тәуелсіздік тартуы», «Қызылорда» және т.б мұралары ұрпаққа рухани азық, жастарға өнеге болары сөзсіз.
Өнер адамын тірісінде бағалай білу – адами құндылықтардың ең үлкені деп түсінеміз және ол біздің азаматтық парызымыз. Сондықтан Әбілқайыр Сыздықовқа Жаңақорған ауданының «Құрметті азаматы» атағын берудің идеологиялық мәні терең іс екені анық.
Моңғолияның Баян-Өлгей аймағы, Түркістан қаласының «Құрметті азаматы» атанған Жолтай Әлмашқа ауданның «Құрметті азаматын» беру орынды деп білеміз. Өзге өңірлер жазушының потенциялын мойындайды, халық рухани сусындар туындылардың авторы ретінде жоғары бағаланады. Әсіресе тұлғатану бағытындағы ізденісі – Сұлтанбек Қожанов, Нәзір Төреқұлов жайлы жазған романы өшпес рухани қазына екені анық. Яғни Жолтай аға ұлтқа ортақ тұлға. Жолтай аға арқылы Жаңақорғанды дәріптеуге болады. Бізде мұндай тұлғалар көп. Солардың елге сіңірген еңбегін саралап, ескерсек қайтеді?!
Лондон Олимпиадасына қатысып, үздік бестікпен түйіндеген, Азияның үш дүркін чемпионы Дәулет Ниязбеков пен оның жаттықтырушысы, еркін күрестен Қызылорда облысының аға бапкері Әбутәліп Аманов та осы атаққа әбден лайықты. Айтқандай, Дәулет Шораұлы Токио Олимпиадасына жолдама алып, аудан тарихында төртжылдықтың басты додасына екі рет қатысатын жалғыз спортшы болғалы тұр. Дәулетті рухани қолдасақ, кім біледі, Токиода алаштың атын шығаратын шығар...
Бұл қатарда елдік мұрат турасында туындысын жазып, ағартушылық қызмет жасап жүрген жерлес қаламгер мен ғалымдарды да ескерусіз қалдырмаған дұрыс болар деген ой бар.
Айтқым келгені, жақсыларымыз бен жайсаңдарымызды көзі тірісінде бағалай білейік. Себебі, барды бағалай білу де – бір бақыт!
Нұрлат БАЙГЕНЖЕ
