Алғаш рет өткізілген «Үздіктер шеруі»-2020 іс-шарасы Сүттіқұдық ауылдық клуб үйінде өрбіді. Айтулы марапатты анықтап, мерейлі мара­патты табыстауға аудан әкімінің орынбасары Дархан Есалыұлы арнайы барып, өнерлі қауымның коро­навирус кезінде елдің еңсесін тіктеп, жігер­лендіруге қосқан еңбегін атап өтті.

– Еліміз сын сағатты бастан өткеруде. Қиын жағдайда елдің рухани қолдаушы болып, бұқараға мәнді де мағыналы іс-шара ұсынудың жолын тауып, бар күшін қызметіне арнаған аяулы жандарды құрметтеу құптарлық іс», – деді ол.

Салтанатты шеруде «Үздік ұжым» номинациясын «Қаратау қазынасы» ха­лық­тық фольклорлық ансамблі ен­шіледі. «Жыл жаңалығы» аталымы бойынша Сүттіқұдық ауылдық клубы ерек­шеленсе, «Үздік онлайн шара» номи­нациясын Түгіскен ауыл­дық клубы­ның «Жұмаға дейінгі жаңалықтар» атты жаңалықтар блогы алды. «Үздік ақпаратшы» аталымы «Арман» кенттік мәдениет үйіне бұйырды.

Сонымен қатар Кенже Әкімбаева «Үздік Рухани жаңғыру жобасы», Балмұ­хам­мед Әбжаппаров пен Тохтар Әжімұратов «Үздік шығармашылық дуэт», Айжарқын Садыбайұлы «Үздік сұхбат жүргізуші», Талап Тотаев «Үздік жоба авторы», Нұрлан Жәпеков «Үздік тәлімгер-жетекші», Оразғали Бидашев «Үздік сазгер», Фархат Бакиров «Үздік үйірме жетекшісі», Сырым Манап «Үздік клуб қызметкері» атанды.

Байкенже ауылдық клубының хо­рео­графы Анель Құрбанова «Үздік хореограф» номинациясымен, Таңшол­пан Төрехан «Үздік әдіскер-дизайнер» номинациясымен, Асылхан Палахметов «Үздік оператор» номинациясымен марапатталды. Ал Әбдіғаппар ауылдық клубы «Үздік онлайн-концерт» ата­лымына лайық деп танылды.

Аудандық мәдениет және тілдерді дамыту бөлімінің басшысы Аягөз Айдосова мәдениет саласының қызмет­керлері қандай уақытта болмасын алдынғы шепте қызмет ететінін, бұған каран­тин кезінде өнерпаздардың өнері дәлел болатынын айтты.

Расында, «Рухани жаңғыру» бағдар­ламасы қоғамдық сананы әлемдік деңгейге көтерудің кең ауқымды ре­фор­­малық идеясы жатыр десек, осы қоғамдық сана жаңғыруының қозғау­шы күшіне мәдениет саласының қыз­меткерлері өлшеусіз үлес қосып келеді. Мұны Сүттіқұдық ауылдық окру­гінің әкімі Мақсат Абдуллаев қуаттап:

– Ұлы ойшыл әл-Фарабидің 1550 жылдығы, ақын Абайдың 175 жылдығы, Алтын Орданың 750 жылдығы және т.б атаулы даталардың тарихи мәні мен мәдени маңызын аудан өнер­паздары жан-жақты насихаттады. Оны­мен фейсбук, инстаграмм арқылы жүргізілген онлайн шаралар арқылы хабардар болдық, Осылайша мәдениет саласының қызметкерлері елдің енсесін тіктеуге үлес қосып, «Рухани жаңғыру» бағдарламасына үлес қосты, – деді.

Марапат биігінен көрінген «Қаратау қазы­насы» халықтық фольклорлық ансамблінің жетекшісі Ақнұр Қалды­баева қуанышымын бөлісіп: «Кез-кел­ген марапат шығармашылық адамды ша­быт­тандырады әрі жауапкершілік жүгін арттырады», – деді.

  ТҮЙІН. «Ұлт мәдениеті – рухани жаңғыру кілті» десек, осы кілттің иесі саналатын өнерпаздарды марапаттап, мәртебесін асырып, мерейін тасытқаны құптарлық іс болды. Бұл қолдау рухани-мәдени бағыттағы шаралардың сапалы атқарылуына септігін тигізетіні анық.