ТӘЖІРИБЕЛІ ТӘРБИЕШІ
Сүттіқұдық ауылдық округінде орналасқан «Оралхан» балабақшасының ашылғанына алты жылдан асты. 40 орындық балалар мекенінде тәрбиешілік қызмет жасайтын тәрбиешінің бірі – Индира Асқарқызының еңбегін ата-аналар жоғары бағалайды. Тек бала тәрбиесімен шектелмей, елді мекен өміріндегі қоғамдық жұмыстарға, түрлі семинарларға белсенді қатысып, жаңа бағдарламаларды меңгеруге ерекше мән беретін тәжірибелі бала бағбанын сөзге тартып, қызметімен таныстық.
Әрбір үйдің үкілі үмітін келешекке жалғаған жас ұраққа тәлімді тәрбие беріп, ойы озық, өмірге бейім азамат етіп өсіруге үлес қосатын ұстаз қауымының орны қашанда төрде. Қазақта «дұрыс қанаттанған түзу ұшар» деген нақыл бар. Сондықтан, әр баланың қауырсыны қатайғанға дейін санасына сәуле нұрын шашып тұратын асыл жандардың абзалы – ұстаз. Бес жыл тәрбиешілік қызметте жүрген Индира апай мұндай ұлағатты жастарға ұқтырып келеді.
– Бала кездегі арман адастырмай ұстаздық жолды таңдадым. Табиғатыма жақын мамандық иесі атанғаныма еш өкінбеймін. Қандай тұлға болсын қызметіне адал, жан-тәнімен берілген болса, онда ол кісіден білікті маман шығады деген қағиданы өмірлік ұстаным еткен жанмын. Мен үшін ұрпақ тәрбиесі бірінші орында тұрады, – деп әңгімесін бастады ол.
Еңбекке ерте араласқан кейіпкеріміз қызметін Белкөл кентінде мектеп-интернатта тәрбиеші болып бастайды. Одан кейін Қожамберді ауылында "Бақберген" балабақшасында тәрбиешілік қызметін жалғастырады. Көп уақыт өтпей Сүттіқұдықтағы Гүлжайна Рыспаева құрылтайшылық ететін "Оралхан" балабақшасына қызметке орналасады.
– Индира Асқарқызы білікті маман. Бала тәрбиесінде тәжірибесі толысқан, білікті кадр. Сондықтан, Индира тәлімгердің қызметіне ауыл тұрғындары дән разы, – деді мекеме меңгерушісі Ақтоты Есімова.
Қазір балабақша екі топқа бөлініп, ауыл балаларын тәрбиелеуде. 3-4 және 4-5 жас аралығындағы балғындар би үйірмесіне қатысады. Үштілділік, яғни, ағылшын және орыс тілінен дәріс алады. Ал, мектепке даярлық сыныбын №52 М.Аралбаев атандағы білім ошағының ұстаздары келіп дәріс береді екен. Ал, ашық сабақ, рухани шаралар, «Тәй-тәй» бағдарламасы аясындағы сабақтарды жиі өткізу бала санасының жетілуіне оң әсер етеді дейді тәлімгер.
– Қазақ даналығында «балаға өз тіліңмен емес, өз тілімен сөйлес» дейді. Расында, баланың болашағына дұрыс бағдар берген абзал. Себебі олар елдің ертеңі. Тәрбиемен қатар олардың толыққанды қалыптасуы маңызды. Баланың жасы ұлғайған сайын оның сөздік қоры арта түсуі керек. Мұндай да ата-ана салғырттық танытпауы тиіс. Сондықтан, күнделікті баланың танымын кеңейту мақсатында тақырыптық ертеңгіліктер ұйымдастырып тұрамыз. Оған қоса, «Шебер қол» деген арнайы дәрісті балғындарды еңбекке баулимыз, – деді ұстаз.
Елдің ертеңгі болашағы – бүгінгі бүлдіршіндер. Балаға тәлімді тәрбие беру – тұтастай ұлтты тәрбиелеумен тең. Демек, бала тәрбиесі саласында тер төгіп жүрген әр маман оның болашағынан зор үміт күтері анық. Тәртіпке үйлескен тәрбиені жас сәбидің тұла бойына сіңіріп, оның келешекте парасатты азамат болып қалыптасуына бар күш-жігерін арнап жүрген бала бағбандарының еңбегі еселі.
Біз сөз еткен Индира Асқарқызының бойындағы кеңдік, балаға деген мейірімі, мақсатына жетудегі ізденісі болашақ тәлімгерлерге үлгі-өнеге...
Айсұлу АЛДАНАЗАР.
