ӘКІМДЕР ЕСЕБІ: ЕКПІНДІНІҢ ЕКПІНІ ҚАНДАЙ?

Ауыл әкімі Қ.Қожамжаров салық түсімін ұлғайту бағытындағы атқарылған жұмысын баяндады.

Міндетті салық төлемдерінен 2018 жылы округ бойынша жер салығына 79478 теңге жиналып, 100% орындалып, мүлік салығынан 7000 теңге орнына 17740 тенге жиналып 249,9% орындалып, жоспар бойынша көлік салығынан 534238 теңге жиналу керек еді 265820 теңге жиналып 50 % орындалып отыр. Яғни, көлік салығында түсім аз. Оған қоса, кәсіпкерлік бағытта ауылдық округ бойынша «Еңбек» жұмыспен қамту және жаппай кәсіпкерлікті дамыту-2017-2021 жылдарға арналған бағдарламасы бойын­ша 3 азамат шағын несиеге қол жеткізген. Десе де, елдімекенде қордаланған мәселеде жетерлік.

Өз кезегінде «Екпінді» шаруа қожа­лығының төрағасы Аманбай Орынбаев, ауыл тұрғыны Нағашыбек Боранбаев, Серікбай Есімов инвестордан қандай көмек болатынын сұрады. Мәселен, М-3 каналын қоға басып кеткенін, ал, Р-3 су қашыртқысы үстіне салынған көпірдің апатты жағдайда екенін айта келе, жергілікті биліктен көмек сұрады. Бұл сұраққа аудан басшысы Ғалым Әміреев жауап берді. Оның айтуынша, инвестордың арқасында күріш егуге жарамсызданып қалған жерлердің 80 пайыздан астамы инженерлік жүйеге келтірілген. Мұның өзі үлкен көмек. Әбдімажит Сыздықұлы М-3 каналының өздерінің теңгерімінде еместігін, мұны облыстық табиғатты қорғау және табиғи ресурстарды пайдалану басқармасына хат жазу керектігін, ал, Р-3 су қашыртқысының Шиелі ауданының теңгерімінде екенін атап көрсетті.