ЖАС МЕРГЕН-2025: АУДАНДЫҚ ІРІКТЕУ

Апта басында оқушы ұлдар арасында өткен әскери қолданбалы спорт түрлерінен «Жас мерген-2025» әскери-патриоттық аудандық іріктеу сайысында үздіктер анықталды. Қызылорда облысы білім басқармасының Тәрбие, спорт және қосымша білім беру орталығының және аудандық білім бөлімінің жылдық іс-шаралар жоспарына сәйкес ұйымдастырылған дәстүрлі додаға барлық білім беру ұйымдары қатысты.

№293 орта мектеп базасында өткізілген спорттық сайыста Орталық аймағы-1 (№51, 169, 193, Ө.Жүмаділла мектебі), Орталық аймағы-2 (№110, 163, 289, А.Абдуллаев мектебі), Ынтымақ аймағы (№55, 164, 293), Сығанақ аймағы (№52, 53, 166, 195 мектеп), Тау аймағы (№54, 161, 239, 247 мектеп), Сыр аймағы (№168, 196, 213, 224 мектеп), Аққорған аймағы (№184, 192, 256) командалары өзара бақ сынады.
Спорт залында мектеп командалары алдымен сапқа тұрғызылып, ҚР Мемлекеттік туы енгізіліп, әнұран орындалды. Жаңақорған ауданы бойынша білім бөлімінің басшы­сы Нариман Жахудаев салтанатты жиынды ашып, сайысқа қатысушыларға сәттілік тіледі.
Сайыс бағдарламасы бойынша команда­лар пневматикалық винтовкамен нысана ату, АК-74 ММГ оқу қаруын жартылай бөлшектеу/ жинақтау, АК-74 ММГ оқу қаруының оқжатарын патрондармен жарақтау, жал­пы әскери қорғаныш жиынтығын кию, кермеде тартылу, әскерилендірілген кросс сайыстары бойынша додаға түсті. Сайыс қорытындысымен бас жүлде Ынтымақ аймағына бұйырды. 1-орынға Сыр аймағы жайғасса, 2-орын №2 Орталық аймағының еншісіне бұйырды. Үшінші орынға Аққорған аймағы ие болды.
Жеңімпаз командалар мен үздік нәтиже көрсеткен оқушыларға білім бөлімінің дипломдары мен медальдары табысталды.

Арман ЕГЕМБЕРДИЕВ,
бірлестік жетекшісі