МЕРГЕН АРУЛАР БӘСЕКЕСІ
Ел Тәуелсіздігі күніне орай мектеп оқушы қыздар арасында әскери қолданбалы спорт түрлерінен «Мерген ару-2024» әскери патриоттық аудандық сайысы жылды түйіндеді. №254 орта мектебінде өткен аудандық сынға Орталық аймағы (№286 мектеп), Ордакент аймағы (№193 мектеп), Ынтымақ аймағы (№221 мектеп), Тау аймағы (№247 мектеп), Сыр аймағы (№245 мектеп), Аққорған аймағы (№192 мектеп) және Ынтымақ аймағы (№254 мектеп) командалары қатысты.
Алдымен №254 орта мектебінің директоры А.Атахожаев салтанатты жиынды ашып, сайысқа қатысушы қыздарға сәттілік тілесе, бас төреші А.Егембердиев сайыстың мақсатын, шарттары мен ережесін таныстырды.
Сайыс бағдарламасы бойынша пневматикалық винтовкамен нысана ату, пневматикалық винтовкамен жылдамдыққа нысана ату, АК-74 ММГ оқу қаруын жартылай бөлшектеу және жинақтау, газтұмылдырықты уақытқа кию, шалқалап жатып денені көтеру (пресс) кезеңдерінде бұрымдылар бағын сынады. Сонымен қыздар арасында әскери қолданбалы спорт түрлерінен ұйымдастырылған аудандық сайыстың нысана ату бағдарламасы бойынша жоғары ұпай жинап, «Үздік мерген ару-2024» номинациясымен Диана Садыр, Еркеназ Жұмахан, Нұргүл Құрмантай, Жұлдыз Апжаппар мен Саяра Амантай марапатталды. Жалпы командалық сында 1-орын Б.Нұрмышов жаттықтырған №221 орта мектеп иеленсе, 2-ші тұғырға №192 орта мектебі қонды (А.Егембердиев), ал, үздік үштікті №245 орта мектеп түйіндеді. (Ш.Тлеубергенов).
Жеңімпаз командалар мен үздік нәтиже көрсеткен оқушылар білім бөлімінің арнайы дипломдарымен және №254 орта мектеп АӘТД пәні оқытышу-ұйымдастырушысы Н.Ергешбайдың арнайы сыйлықтарымен марапатталды.
Нұртаза ЕРГЕШБАЙ,
№254 мектеп АӘТД пәні о/ұ
