"Жасыл ел" жігерлі жастар жұмысы

Жастарды еңбексүйгіштік пен тазалыққа тәрбиелейтін "Жасыл ел" бағдарламасының болашағы баянды. Жастар жасағы қатарында еңбек етіп, қосымша қаражат тапсам дегендердің дені жас буын. Бағдарламаның да мақсаты – елді мекен ішін жасыл желекке көмкеріп, туған жерге деген патриоттық сезімін арттыра отырып, жұмыссыздық деңгейін төмендету. Жазғы демалыста бос уақытын тиімді өткізіп, оқу ақысына тамшыдай болса да қаражат табуға мол мүмкіндік.
Кент орталығында "Жасыл ел" жастар жасағы өз жұмысын бастап кетті. Маусым айының алғашқы күндерінен-ақ кент көшелеріндегі жасыл желекке күтім жасап, көшелердің тазалығына дем беруде. Тәуелсіздік көшесінің бойындағы жаңа отырғызылған көшеттердің арамшөптерінен тазалап, топырағын қопсытып жүр.
"Жасыл ел" бағдарламасы жастар қауымының Отанға деген сүйіспеншілігін арттырып, тазалық сақтауға, экологиялық тәлім алуға таптырмайтын жоба. Әрине, ең бастысы, елдік мүдде жолында адал еңбектенудің ерен үлгісін көрсетеді.