Нәзік жанды заңгер
Әйел – әлемнің шырақшысы. Олардың қоғамдағы орны мен отбасындағы рөлі қашанда маңызды. Әсіресе, жанұясы мен қоғамдық қызметті қатар арқалап жүрген аналарға артылар салмақ аз емес. Міне, осындай жандар сапында аудандық прокуратураның кеңсе меңгерушісі қызметін абыройлы атқарып жүрген Фарида Байдалиева туралы ерекше тоқталғымыз келеді.
Қазақ-Ресей университетінің «Құқық» факультетін бітірген жас еңбек жолын аудандық прокуратурадан бастайды. Мемлекеттің «тоғыз қабат, тор көзді сауыты» саналатын заң ережелерінің сақталуы ондағы қызметкерлердің берік ұстанымымен де сабақтасып жатады.
– Аталмыш саланың ауырлығына қарамастан ұнатқан мамандықты меңгеруге тырыстым. Әсіресе әйел адам үшін отбасы мен қызметті қатар алып жүру үлкен табандылық пен мықты жігерді қажет етеді. Осындайда «Ісіңізге, еңбегіңізге, оқуыңызға нағыз адамгершілікпен қарасаңыз, сөз жоқ, жеңіске жетесіздер» деген Қаныш Сәтбаев ағамыздың қанатты сөзін қару еттім, – дейді Фарида Пернебекқызы.
Өз жұмысына үлкен жауакершілікпен қарайтын ол аудандық прокуратураға кіріп-шығатын құжаттар тізімін қалт жібермей, азаматтардың арыз-шағымын тіркеп, қанағаттандырылу барысын қадағалайды.
– Халық қашанда заң ережелерінің сақталуын қадағалайтын орган ретінде прокуратураға сенім артады, түрлі жағдайлар бойынша көмек сұрайды. Шешімін таппай жатқан түйіткілді мәселелердің шешілуін заңдық тұрғыда талап етеді. Құпия болғандықтан біз ішкі заңға бағынып, азаматтардың арыз-шағымын жариялай алмаймыз. Қоғам мүшелерін тығырыққа тірейтін түрлі жағдайды көріп, жүрек ауыртар кез аз емес. Осындайда түрлі тағдыр иелеріне адамдық көңілмен жаның да ашиды, – деп ағынан жарылды кейіпкеріміз.
Мамандығын сүйген, оның қадіріне жеткен замандасымыз қызмет салмағын бірге бөлісіп келе жатқан әріптестеріне де алғысын жаудырып, ұжымда жұдырықтай жұмылған ауызбіршіліктің бар екенін айтты. Солардың қатарында Камила Төлегенова мен Ақмарал Исабек сынды әріптестерінің еңбегіне айрықша тоқталды. Қызметінде кездескен әрбір қиындықты ұжым болып шешуді ұстанатын Фарида өз ортасында үлкен беделге ие. Ал өзі жұмыс барысында қанша қиындықпен бетпе-бет келсе де жігері жасымай, ер жігітке бергісіз мінезімен төзімділік танытуға тырысады. Қайткенде мамандығына деген ыстық ықыласына шаң жуытқысы жоқ.
Ол қызметімен қоса үй шаруасын дөңгелетіп отырған аяулы ана, отбасының ұйытқысы, ибалы келін, асыл жар.
Прокуратураның ішкі жұмыстарын ұйымдастырумен қатар қоғамдық жұмыстарға да белсене араласатын Фарида Байдалиеваның еңбегі ескерусіз қалған жоқ. Ол облыс және аудан прокурорының, сонымен қатар облыс және аудан әкімнің «Алғыс хатымен» бірнеше рет марапатталған.
Заң саласында жиырма жылға жуық табандылықпен еңбек етіп, еңбегі биік мінберлерде лайықты бағаланып жүрген Фарида Пернебайқызының кәсібіне адалдығын замандастарына үлгі етуге болады.
Айсұлу Алданазар
