Санаулы күндерден соң жаңа оқу жылы басталады. Бала біткеннің бәрі асыға, ерекше толқыныспен тағатсыздана күтетін уақыты емес пе? Әсіресе, мектеп табалдырығын бірінші рет аттағалы отырған бүлдіршіндер үшін өте маңызды.
Қазір ата-аналардың барлығы балаларына киім алып, жоқ-жітігін даярлап әлек. Дей тұрғанымен, баланың қолына кітап ұстатып, қалам мен дәптер беріп, күнделікті тапсырмалар беру арқылы дайын­даған жөн. Өйткені, адам капита­лын арттырудың бірден-бір ба­ғыты білім, ғылым, инновацияны дамыту. Өркениет көшіне ілескен озық елдердің саясатының басым бағыттары да осы білім саласына арналса керек. Ақпараттық қоғамға аяқ басқан Жаңа Қазақстанда «Білім саласы, мектеп, оқыту» процестері де жаңара түсуде. Сол себептен де, болашағымыз деп балап отыр­ған бүлдіршіндің білім алуына жауаптылық танытқан дұрыс.
Негізі, оқуға деген құштарлық баланың жасынан бастап қалыптасуы керек. Әлбетте, әрбір ата-ана өз перзентіне ең жақсыны қалап, бі­лім­­ді, жан-жақты, озық ойлы бол­ғанын қалайды. Баланың кітап оқуға құмарлығын, үнемі ізденісте болуын қадағалап, ұстазбен бірге ата-ана етене жұмыс жасаса, ондай тәрбиені бойына сіңірген бала на­ғыз бесаспап тұлға болып шығады. Мысалы, мен өзім жұмыс жасайтын «Қыран» негізгі орта мектебінде әрбір оқушымен ұстаздар жеке-дара жұмыс жасап, үлкен нәтижелер көрсетуде. Бәлкім, атаулы мектепті білім саласының аудандық арда­гер-ұстазы, республикаға танымал педагог Шолпан Мажитова сынды ұстаз бен ұжымның саналы ұрпақ қалыптастыру жолында аянбай еңбек етуінің арқасы болар. 
Білікті басшының бағытымен сусындап, еңбек жолында нақты мақсаттарды межелеген ұстаздар үшін жас ұрпақтың келешегі бәрінен де қымбат. Әрбір үйдің еркесі болған балалардың тілін табу, оқуға деген қызығушылығын ашу, бәрі де ұстаздарға тікелей байланыс­ты. Біздің «Қыран» негізгі орта мектебінің ұстаздары үнемі ізденіп, жан-жақтан тәжірбие алмасып, мек­теп табалдырығын аттаған әрбір балаға білім нәрін себуге жүйелі жұмыс жасап, тынымсыз еңбек етуді алға тартап келеміз. Мектеп ұжымы мен оқушылардың осындай бірлесе жасаған нәтижелі жұмыстары білім ордасының биік қадамдарын айқындап-ақ келеді. Мектеп ұжым­ының келешек ұрпағымыздың, Абай атамыз айтпақшы, «Толық Адам» ретінде өсіп-өнуі үшін жасап жатқан парасатты қадамдары өте мол. Мектеп ұжымы өз шәкірттерін білім бәйгесі­не қосуда да аудандық, облыстық, республикалық сайыстардан қалыс қалған емес. Мектепте балалардың көшбасшылық қабілеттерін арттыруға, олардың шығармашылығына қолдау жасауға бағытталған бірқатар үйірме мен таңдау пәндері жұмыс жасай­ды. Яғни, біз мектеп ұжымы бар бі­лім-білігімізді, қажыр-қайратымызды болашақ азаматтарды тәрбиелеуге салып, «Ұстаз» деген атқа лайықты қызмет етудеміз.
Айнұр Мәден,
«Қыран» негізгі орта мектебінің мұғалімі