Сыр аумағындағы сапар
Аудан әкімі Мұрат Жолкелдіұлының ауылдарға іс-сапары Сыр беткейдегі елді мекендерге жалғасты. Аққорғаннан бастап, Байкенжеге дейін жеті округке жол салып, ауылдағы ағайынның тыныс-тіршілігін таразылап, мұң-мұқтажын, талап-тілектерін тыңдап, шешілу жолдарын саралады. Аудандағы жауапты сала басшылары, ардагерлер кеңесінің төрағасы, құқық қорғау саласы басшылары және депутаттар бастаған көш алдымен Түгіскен ауылының тұрғындарымен кездесіп, түйінді мәселелерін тыңдады.
Жалпы Сыр беткейде 11 ауылдық округ бар, бұл ауылдардың негізгі тіршілік көзі – егін және мал шаруашылығы. Әсіресе, ерте көктемнен кетпенін сайлап, ала жаздай тер төгіп, еңбек өнегесін өрнектеген диқандардың айтары көп.
Ағайынға сәлем беріп, батасын алуға, ұсыныс-тілегін тыңдауға барған аудан әкімі бірінші мезетте Президент Қасым-Жомарт Тоқаевтың бастамасымен Конституцияға өзгертулер мен толықтырулар енгізу үшін жалпыхалықтық референдум өтетінін, жұртшылық болып осынау маңызды науқанға, елдің келешегі жолындағы қадамға белсенді қатысуға шақырды.
– Алда үлкен науқан келе жатыр, бұл ертеңіміздің еңселі, келешегіміздің кемел болуына бастайтын бағдар болуы тиіс. Референдум осы бағыттағы жоғымызды түгендеп, заңдарды қайта қалыптастырудың тетігі екенін ескеруіміз керек. Сондықтан саяси бағыттың бастауын бірге құрайық. Бұл бірінші мәселе, екіншіден, ауданға әкім болып келгеніме бір айдың көлемі болды. Ауыл-ауылды аралап, елдің айтарын, мұң-мұқтажын тыңдап, бірлесе шешудің жолын бастадық. Ең бастысы, елге адал қызмет ету ең басты қағидамыз болуға тиіс, – деді аудан басшысы.
Әли ТЕМІРБЕК
