Мерген-2021: Ұстаздар бәсекесі

N163 мектепте аудандық білім беру ұйымдарының алғашқы әскери және техникалық дайындық (АӘТД) пәні ұстаздары арасында «МЕРГЕН-2021» сайысы жылды қорытты. Сайыстың мақсаты – АӘТД пәні оқытушылары арасында өзара тәжірибе алмасу, әскери-қолданбалы спорт түрлерін дамыту арқылы жас ұрпаққа, шәкірттерге өнеге болуды көздеді. Дәстүрге айналған шара жоғары дәрежеде өткенін көрдік.
Сайыстың ашылу салтанатына Жаңақорған ауданы қорғаныс істері жөніндегі бөлімінің басшысы, под­полковник Нұрбол Есеналиев, аудандық білім бөлімі кәсіподақ ұйымының басшысы Елшібек Сатер­шинов, N163 орта мектеп директоры Айгүл Назарымбетова және ардагер ұстаз Ахмет Нахипов сайысқа қатысушыларға жылы лебізін білдіріп, сәттілік тіледі. Бас төреші №245 мектеп мұғалімі Жанболат Қасымбеков сайыстың мақсатын шарт­тарын, ережесін таныстырды.
Жарыс ережесіне сәйкес 40 жасқа дейін қатысушыларға Жанболат Қасымбеков бас қазылық етсе, 41-55 жас аралығында бақ сынаған ұстаздарға бас төреші ретінде Мырзан Қылышбаев әділ бағасын берді. 56 жастан жоғары педагогтардың сайысына Арман Егембердиев бас төрешілік жасады.
Айта кететіні, Мемлекет басшысы Қасым-Жомарт Тоқаев тапсырмасында жастарды әскери бағытта, патриоттық тәрбиелеуде нақты міндеттер қойды. Ертеңгі елдің қорғаны болатын жастарды тәрбиелеп, жас ұрпақты отансүйгіштікке баулуды айтты. Соның алғышарты негізінде алдымен ұстаздар қауымы өздерінің білім-білігін пысықтап, өзара тәжірибесін тоғыстырды.
Сайыс бағдарламасы бойынша пневматикалық винтовкамен нысанаға оқ ату, пневматикалық винтовкамен жылдамдыққа нысананы құлату және «АК-74» оқу қаруын жартылай бөлшектеу, жинақтау сынды үш кезең арқылы мықтылар анықталды.
– Сайыс барысында барлық техни­калық қауіпсіздік ережелері сақталды. Жарыс жалпы жоғары деңгейде ұйымдастырылып, жыл сайын ауқымы кеңейіп келеді. Біздің мақсатымыз пән ұстаздарының тәжі­рибесін толықтырып, білімін шыңдау. Бүгінгі сайысқа аудан мектептерінің барлық пән мұғалімдері қатысып, бағын сынады. Сол арқылы болашақ елдің қорғаны болатын азаматтарды әскери бағытта, патриоттық рухта тәрбиелеу, – деді жарыс ұйымдастыруға ұйытқы болған пән мұғалімі Қуаныш Аилакимов.
Сонымен аудандық «МЕРГЕН-2021» сайысының қорытындысы бойынша 40 жасқа дейін бас жүлде №192 мектеп ұстазы Арман Егембердиевке бұйырды. Бірінші орынға №162 мектеп педагогы Тоқтар Искендиров жайғасса, екінші тұғыр №247 мектеп ұстазы Рыскелді Сүлейменовке бұйырды. №240 мектеп мұғалімі Амантай Сұлтанов қоланы қанағат тұтты.
– Жыл сайын осындай сындарда шыңдалып, біліктілігімізді білдіріп, тәжірибемізді арттыра түсірудеміз. Облыстық сындарда да бақ сынап келеміз, бұл осы пән ұстаздарына үлкен мүмкіндік, – деді Т.Искендиров.
41-55 жас аралығында бас жүлде Жанболат Қасымбековке (№245), бірінші орын Шәкірқожа Үсеновке (№256), екінші орын Нұрлан Башаровқа (№168), үшінші орын Қуаныш Абилакимовке (№163) бұйырды. Ал, 56 жастан жоғары жастағы ұстаздар арасынан бас жүлдені Дүйсенбек Увашев (№53) иеленсе, алтын Серікбай Исаевқа (№55), күміс Мырзан Қылышбаевқа (№54), қола Жарқынбек Қожаметовке (№223) табысталды.
Сайыс жеңімпаздары аудандық білім бөлімінің арнайы дипломдарымен және білім бөлімі кәсіподақ ұйымының номинацияларымен марапатталып, ес­телік сыйлықтары ұлестірді.

Жасұлан СЕЙДЕМЕТОВ