Адам өміріне араша түсіп, қиын сәтте алғашқы көмек көрсететін мейірбикелердің еңбегі қашанда ерен. Солардың қатарында Назира Саулебекова да бар. Ол аудандық аурухананың жансақтау бөлімінде өз қызметін абыройлы атқарып келеді.
            Назира 2007 жылы Алматы қаласындағы Республикалық медицина колледжіне оқуға түсіп, 2011 жылы мейірбике мамандығын меңгеріп шықты. Алғашқы еңбек жолын Институт Педиатрия балалар ауруханасында бастап, 2018 жылға дейін осы мекемеде қызмет етті. Мұнда ол балаларға медициналық көмек көрсетіп, өзінің кәсіби біліктілігін шыңдады. Ал, 2018-2019 жылдары Қазақстанның жетекші медициналық мекемелерінің бірі – Сызғанов атындағы Ұлттық ғылыми хирургия орталығында жұмыс істеп, жаңа тәжірибелер жинақтады. Одан кейін 2019 жылдан бері туған жері Жаңақорған аудандық ауруханасының жансақтау бөлімінде мейірбике болып еңбек етуде.
            Назира Жалғасбекқызы – өз ісіне адал, жауапкершілігі жоғары, кәсіби білікті маман. Ол әр науқасқа жанашырлық танытып, олардың денсаулығын жақсарту жолында аянбай еңбек етеді. Медицина саласындағы көпжылдық тәжірибесінің арқасында ол ауыр халдегі науқастарға дер кезінде көмек көрсетіп, өмір мен өлім арасындағы сәттерде шұғыл шешім қабылдайды.
            Жансақтау бөлімінің мейірбикесі болу – үлкен төзімділікті, кәсіби шеберлікті және адамгершілікті талап ететін жауапты міндет. Назира бұл жолды саналы түрде таңдап, медицинаға деген сүйіспеншілігін ісімен дәлелдеп келеді. Ол әрбір пациентке мейірімділікпен қарап, оларға қажетті көмекті сапалы әрі шынайы ықыласпен көрсетеді.
            Осындай жанқиярлық еңбектің арқасында Назира Саулебекова әріптестері арасында құрметке ие. Ол өз мамандығын мақтан тұтады және қоғамға пайдасын тигізуді басты мақсат етеді.
            –Медицина – мәңгі дамып, жетіліп отыратын сала. Сондықтан үнемі өз білімді жетілдіріп, жаңа әдістерді меңгеруге тырысамын. Өйткені адам жанына араша түсу – үлкен жауапкершілік пен табандылықты талап етеді, - дейді Назира.
            Иә, жансақтау бөлімінің мейірбикесі – өмір үшін күрескер. Кейіпкеріміз осы қасиетті міндетін абыроймен атқарып, көптеген жанның сауығып кетуіне өз үлесін қосып келеді. Ол – шынайы жанашырлықтың, мейірімділіктің және медицинаға деген адалдықтың жарқын көрінісі.
Айсұлу Алданазарова.