ЕҢ...
Ең...
- 1964-1970 жылдары Сырдария өзенінің қалыпты жағдайында ең енді жері – 200 метрге дейін жеткен. Ал, тайыз жері – 1,5 метрді құраса, ең терең жері – 30 метр болыпты.
- Сырдария өзені суының ең аз болған кезі 1984 жылдың тамыз-қараша айы. Ол кезде «Бірлік» кеңшарына қарасты №3 бөлімше шопандарының қойлары Қауық елді мекені тұсынан дарияны кешіп өткен.
- 1960 жылдары аудан аумағында 50-ден астам көл болса, казіргі таңда соның 16-сы ғана сақталды. Оның негізгі себебі, дария суы деңгейінің тұрақсыздығы салдарынан көптеген көлдерге құятын өзен арналары бітеліп қалды. Қазір олардың арасында ең суы молы Өзгент көлі мен Жәшікөл ғана.
- Аудан көлемінде Бесарық және Жиделі су қоймалары болса, бұдан өзге Қыраш пен Манап ауылында тоғандар бар. Сондай-ақ, Шұқырой жасанды көлі бар. Осылардың ішіндегі суы ең көбі Шұқырой көлі, онда биылғы жылдың ақпан-сәуір айында 30 млн. текше метр су болды.
- Аудан көлемінде ең қысқа мерзімде қолмен қазылған су жолы – Сунақата каналы. Ол 1944 жылы 15 қазанда басталып 1945 жылы 15 қаңтарда аяқталған. Канал жұмысына 23 колхоз бен «Горняк» қосалқы шаруашылығынан 1500 адам, бір автомашина, үш трактор, екі грейдер, алты беккер күрегі, 10 ат скрепері, 29 шана, 50 көлік бөлінген. Каналдың табанының ені 6 метр, ұзындығы 23 шақырымға созылған. Сондай-ақ «Сунақата» деген атпен 11 жауынгерлік парақ пен 3 қабырға газеті шығарылған.
- Аудандағы ең бірінші су маманы Ленинградта оқып келген Раушанбек Әбенов. Ол 1920 жылы халықтың басын қосып Сырдария өзені бойындағы Сумағар деген жерден канал тарту жұмысын бастатқан. Өкінішке орай, бастамашының көз жұмуына байланысты жұмыс аяқсыз қалды.
- Білікті де білімді басшысы болған Зұлпыхар Мұсахановтың бастамасымен Түгіскен массивін игеруге байланысты канал жұмысы жаңадан жүргізілді. Бұл канал – аудандағы ең ұзын канал. Жалпы ұзындығы – 107 шақырымды құрайды. Кейін оған Мұсаханов аты берілді.
- 1966 жылы аудан құрылғанда аудандық суландыру жүйелері басқармасы ұйымдастырылып, оның тұңғыш басқарушысы болып Құлжабек Әйменов тағайындалды.
- Ауданда су шаруашылығы мекемесін ең ұзақ басқарған басшы Дәрібай Айдарбеков. Ол бұл мекемені 1994-2011 жылдар аралығында 18 жыл басқарып, 1996-2002 жылдарғы қиыншылық кездері мекемені сақтап калуға зор үлес қосты.
Пікір 2