Атаулы қонақтары ардагер журналист Ерубай Қалдыбек, еңбек ардагері, гир тасын көтеруден халықаралық әлем чемпионаттарының бірнеше дүркін жүлдегері Серік Ибрагимов, спорт мектебінің директоры, облыстық ұлттық ат спортының аға жаттықтырушысы Ислам Боранбаев, облыстық еркін күрестен аға жаттықтырушы Серік Әбдімәуленовтер өз өткен өмір жолдарынан жастарға тәрбиелік мәні зор әңгімелерден сыр шертті.

Аталған шарада сөз алған аудандық жұмыспен қамту, әлеуметтік бағдарламалар бөлімінің басшысы Аягөз Айдосова қатысушыларға ыстық лебізін білдірді.

– Өміріміздің мәні мен сәні де осы балалар ғой. Бүгінгі таңда мемлекет тарапынан мүгедектер үшін көптеген бағдарламалар жасақталып, жұмыстар жүріп жатыр. Ең бастысы, мүгедек балаларды сәби кезінен бастап анықтап, олардың ортаға бейімделуіне жағдай жасауымыз керек. Жалпы баланы қоғамға бейімдеу мен оқытуда ерте диагностикалау мен түзету маңызды. Мүмкіндігі шектеулі, мүгедек балалар тәрбиесіне ерекше мән берілуі керек. Ауданда тағдыр тауқыметіне түсіп, туа бітті кемтарлыққа немесе жол көлік апатынан мүгедек болған балалар аз емес, – деген ол бөлім тарапынан атқарылып жатқан жұмыстарға тоқталды.

Шара соңы, «Ақжүрек» қоғамдық қорының төрағасы О.Пазыловтың демеушілігімен арнайы тәттілермен мерекелік дастархан басында сыр-сұхбатқа ұласты. Арнайы сый-сияпатқа ие болған жандар өздеріне жасалған жанашырлыққа ризалықтарын білдіріп, аялы алақанын тосып, жүрек жылуын ұсынған жандарға алғыстарын жеткізді. Жан әлеміндегі теңдесіз жылу – жүрек жылулығы. Қиялға қанат қағып, көкке самғағысы келетін жандарға жүректегі бар жылылықты беруден асқан бақыт жоқ.