Бұған қалай қол жеткізуге болады? Тап-таза еңбекқорлықпен. Өз жұмысына шын ниетімен берілген адал адам ғана алақолдықтан ада, кәсіібін шынайы сүйіспеншілікпен атқарады. Басшының осындай мінезіне жетік қарауындағылар сенімнен шығудың жолы – риясыз бейнет қана екенін жақсы сезініп, өз жұмыстарын адал атқаруға тырысты. Көз алдында жүрген кадрларының шамашарқына баға беріп отыратын қамқор басшы қарауындағы бала бағбандарын кезегімен арнайы оқу орындарында білімін жалғастыруға кеңес беріп, демеп-қолдап отыруының нәтижесінде осы жерден өсіп-қалыптасып, кәсіби карьерасын тіктеген шәкірттері де аз емес. Іс тетігін таба білген басшы сол кездері «Харрикейн-Құмкөл» мұнай компаниясымен әріптестік келісімге келіп, қуатты өндірістің қомақты қолдауын білдіршіндер мекеніне бұрғыза білуінде де нәзік мәмілегерлікке толы қарымқатынасты орнықтыру талабын танимыз. Нәтижесінде сол қиын кезеңнің өзінде өспірімдер орталығын талапқа сай жаңарту өз алдына, компания басшылығы мереке сайын мекемеге сыйсияпаттарын жіберіп, балғындарды қуантып отырғаны есімізден кете қойған жоқ. Іс тетігі – ұйымдастыруда десек, оның бұдан бөлек ұжымды басқарудағы біліктіліігі, қарапайымдылығы, ізгілікті ұстанымнан таймайтындығы болар, қырық бес жыл басшылық қызметінде қарауындағылардан бірде-бір түсінік, арыз-шағым атаулы кездеспеуі , басшының жалпыға бірдей жанашыр қағиданы мықты ұстана білген табандылығын танытса керек. Айсара Нәлібаеваның осы бағыттағы еңбектері орынды бағаланып, аудандық, облыстық, білім басқармасынынң Құрмет грамотасымен, Қазақстан Республикасы Президентінің «Алғыс хатымен», «Ыбырай Алтынсарин» медалімен марапатталған.
Зейнеткерлікке шықса да кәсіпкерлікпен айналысып, халыққа қажырлы қызметін жалғастырып келе жатқан үлкен жүректі анамен сұхбаттасқанымызда , өмірлік кредосы – өзгеге қолұшын созу, кім болсын қолынан келсе жақсылық жасауды мұрат тұтатын жанның өмір жолы көз алдымызға елестеді. Қарамағында жүрген қызметкерлері ғана емес, осы кісіні жақын тұтып, қиналғанда жәрдем сұрап алдына барған кімге болсын көмегін беруден тартынбай, қамығып келгеннің күліп шығуына қолынан келгенін аямайтын қасиеті туралы көптің пікірінің де бекер емес екеніне көзіміз жетті. Осы орайда кейіпкеріміздің «Байлық пен мансап – қолға ұстаған мұз, ериді де кетеді, елге жасаған қызмет – артта қалған із, ұрпақтан ұрпаққа жетеді» деген аталы сөзді өз өміріне темірқазық етіп ұстай білетін сарабдалдық мінезіне тәнті болғандаймыз.
«Қазірде соңымыздан ерген жастардың тәлім-тәрбиесі мәселесінде сабақтастық үзіліп бара жатқандай. Әдептілік, арнамыс, адамгершілік қағидаларын мықты ұстануда ұстын боларлық қазығымыздан ажырап барамыз. Осыны қалай орнына келтіруге болады? Осы бағытта аудандағы зиялы қауым бас біріктіріп, барымызды бағалап, жоғымыздың орнны толтыруда «бір жағадан бас, бір жеңнен қол шығарып», халықтық дәстүр-салтымыздың үлгілік тұстарын үкілей білуіміз қажет қой деген пікірлері осыны дәлелдеді.
Отбасында ері, ауылшаруашылығы саласының ардагері, көп жылдар «Красная звезда» совхозында мал дәрігері болып қызмет еткен Райыс ағамыз екеуі 6 перзент өсіріп тәрбиеледі. Бәрі де жоғары білімді мамандар. Халық қызметінің түрлі саласында еңбек етуде. ТҮЙІН: Тәлімгерлік қадірқасиетінен танбай, ақыл-кеңесін бөлісіп, өсиет-өнегесін айтудан жалықпайтын Айсара апаны аудан қыз-келіншектері ардақты ұстаз, ұлағатты ана ретінде сыйлайды, биік құрметтейді. Елдің құрметі кісіге салмақты міндет жүктейтіні рас. Халықтың ықыласынан артық баға жоқ.