ЖИЫРМА БІР ЖАСҚА ТОЛҒАНША АЛИМЕНТ ӨНДІРІЛДІ

Жаңақорған аудандық сотында талап қоюшы Ә-нің жауапкер Д-дан орта білімнен кейінгі білім беру жүйесінде оқитын жиырма бір жасқа дейінгі балаға күтіп-бағу қаражатын 20 айлық есептік көрсеткіш мөлшерінде алимент өндіріп алу туралы азаматтық іс қаралды.

Сот барысында жауапкер Д-ның қызы 2003 жылдың 25 мамырында туған талап қоюшы Ә-нің жоғарғы оқу орнының күндізгі оқу нысанының 2 курс студенті.

Ол 18 жасқа толған. Әкесі Д-ның материалдық көмек көрсетпейтінін негіздеп, жауапкер ретінде әкесінен жоғарғы оқу орнын аяқтағанша айлық есептік көрсеткіштің жиырма еселеленген мөлшерінде алимент өндіруді сұрап, талап қоюмен жүгінген.

Жауапкер Д., талап қою арызын ішінара мойындайтынын, себебі қазіргі уақытта тұрақты жұмысының жоғын, айына 10 000 теңгеден артық төлей алмайтынын көрсеткен.

Аудандық соттың шешімімен талап қоюшы Ә-нің жауапкер Д-дан алимент өндіру жайлы талап қою арызы қанағаттандырылды.

Жауапкер Д-дан талап қоюшы Ә-нің пайдасына жиырма бір жасқа толғанға дейін 25 мамыр 2024 жылға дейін ай сайын айлық есептік көрсеткіштің 7 еселенген мөлшерінде алимент өндірілді.

Ақпарат: Жаңақорған аудандық сотының баспасөз қызметі.