«Алтын күз» мерекесі ел байлығын арттырған берекелі уақыт қой. Сары алтындай сары күз дала диқандарының еңбектері еселенетін, егінге қамба толып, жиын-терімнің аяқталатын шағы.

«Еңбек еткен емеді, еңбексіз не өнеді» демекші, биыл ауылдағы ағайын­ның егіні бітік, көңілі тоқ, қалтасы қалың. Ала жаздай дала төсінде жұмыс атқарған шаруаның бейнеті орасан десек қателеспейміз. Осындай биіктікті бағындырып, еңбегі еленген азаматтың бірі – Сәр­сен­бай Нұрсейіт ағамыз. Машбек ауылындағы «Нұрсейіт» шаруа қожа­лығының жоңышқа өсірушісі «Алтын күз – 2020» салтанатты ша­ра­сында «Озат жоңышқа өсіруші» номинациясы бойынша марапат биігінен көрінді. Облыс әкімі Гүлшара Әбдіқалықованың қолынан алғыс хат алып, үлкен құрметке ие болды. Егіншіліктің қыр-сырын терең мең­герген диқан 32 гектар жерге жоңышқа егіп, әр гектарына 120 центнерден өнім алған.
Жастайынан еңбекке ерте араласып, әкесінің жанында мол тәжірбие жинаған Нұрсейіт Сәрсен­байұлының осы салада еңбек етіп келе жатқанына отыз жылдан асыпты. Ерен еңбексүйгіштігінің арқасында уақытпен санаспай маңдай терін жер – анаға сіңіріп келеді. Бүгінде тәжірибесі мол, ауыл-аймаққа үлгі болып отырған ел ағасы.
– Еңбек етіп, еріншектікке са­лын­­басаң қара жер де құр алақан қалдырмайды. Бала кезден қыр­мандағы қызу шаруаны көріп өстім. Сондықтан болар, диқан­шы­лық­қа ерекше ықыласым ауып, жан қалауыммен ден қойдым.
Денсау­лығым жарап тұрса әлі де жалғастыра беремін. Қажырлылық танытсаң қай салада болмасын шыңға шығуға болады. Осы еңбегімізді бағалап облыс әкімі арнайы сый-сыяпаттарын табыстады. Еңбегіміздің еленгеніне біз де бір марқайып қайттық – дейді Нұрсейіт аға.
Нағыз диқан болу үшін темірдей төзім мен тынымсыз еңбек қажет. Сондықтан ауыл шаруашылығы сала­сын өркендетіп, тынбай еңбек еткен азаматтар қашанда мақтауға лайық. Осылай үзіліссіз 30 жыл еңбек ету кезінде үнемі өсу, табысқа жету, ел құрметіне бөлену дәрежесінде бол­ған Сәрсенбай Нұрсейіттің бұл марапаттан бөлек, мемлекет тарапынан алған наградалары аз емес. Бұл – еткен еңбектің еленгені.

Әсел РЗАЕВА