Жаңақорған ауданы көлімінде карантин жариялануына байланысты қатаң режимді жұмыс жүруде. Қазір барлық елді мекен мен аудан орталығына кіріп-шығатын жолдарға блок-пост қойылды. Мұны Жаңақорған аудандық полиция бөлімі бастығының бірінші орынбасары, полиция подполковнигі Айбол Жолдасбаев хабарлады.

Оның сөзінше, қазір Жаңақорған кентіне кіріп-шығатын төрт жолға блок-пост қойылды. Одан бөлек, Түркістан облысымен шектесетін Бесарық, Көктөбе ауылының маңына санитарлық блок-пост жұмыс істейді. Ауылдық округтерге кіретін жолдар да жабылды.
– Аудандық аурухананың жұқпалы аурулар бөлімшесіне және санитарлық пункт ретінде белгіленген Жаңақорған агро-техникалық колледжінің жатаханасына бір-бір бекет қойып, полиция қызметкерлері кезекшілікпен қызмет етуде.
Жаңақорған кентінің тұрғындары дүкенге азық-түлік алуға және дәріханаға дәрі-дәрмек алуға ғана шығады. Қалған жағдайда үйде отырғаны абзал. Себебі, жұқпалы дерттің алдын алудың ең тиімді жолы – үйде отыру, – дейді полиция подполковнигі.
Естеріне сала кететіні, 1 сәуір сағат 14.40-та Қазақстан бойынша 369 адамнан короновирус инфекциясы анықталды. Оның 24-і Қызылорда облысында тіркелсе, Жаңақорған ауданы бойынша 15 науқасқа жетті.