Сақтансаң, сақтайды!
Қазақстанда вирус жұқтырғандар саны күн санап өсіп келеді. 30 наурыз сағат 13.00-де coronavirus2020.kz сайты 302 қазақстандықтан COVID-19 анықталғанын жариялады. Оның ішінде, Қызылорда облысындағы бес адамнан вирустың белгілері белгілі болды. Бұл дегеніміз, сақтық шараларын қатаңдату керектігін көрсетіп отыр. Осыған байланысты аудан әкімі Сұлтан Мақашов сала мамандарын жинап, штаб отырысын өткізді.
Оған «Nur Otan» партиясы аудандық филиалы төрағасының бірінші орынбасары Мәжит Балқожаев, аудан прокуроры Дарын Әбіш, аудан әкімінің орынбасары Адай Салыбеков, Ғалымжан Сопыбеков және Дархан Тұрсынбаев, ішкі саясат бөлімінің басшысы Әбілғазы Төлегенов, кәсіпкерлік, өнеркәсіп және туризм бөлімінің басшысы Қаржыбек Бүркітбаев, Жаңақорған аудандық тауарлармен көрсетілетін қызметтердің сапасы мен қауіпсіздігін бақылау басқармасы басшысының міндетін атқарушы Шынар Айдарова, полиция бөлімінің бастығы Ғани Тұрсекеев қатысты. Сондай-ақ төтенше жағдайлар бөлімінің бастығы Берікбай Омаров, аудандық аурухананың бас дәрігері Яхия Шорабаев, аудан әкімдігі аумақтық қорғаныс және төтенше жағдайлардың алдын алу бөлімінің басшысы Шерхан Ашимов төбе көрсетті.
Аудан басшысы Сұлтан Мақашов сала басшыларының алдына бірқатар мәселені қойды. Енді азық-түлік орындарынан басқа бірде-бір кәсіпкерлік нысан жұмыс істемеуі тиіс. Аудан тұрғындары масканы қолдануы міндетті. Той-томалақта жүргендерге айыппұл салынады. Такси қызметін тоқтату керек. Ең бастысы, медицина қызметкерлерінің қауіпсіздігі үшін тиісті құрал-жабдықтармен қамтамасыз ету маңызды.
Жауапты мамандар Түркістан облысымен шектесетін тұста екі блок-пост қойылып, кезекшілікпен арнайы мамандар жұмыс жасап жатқанын, сондай-ақ тұрғындарға сақтық шараларын насихаттау бағытындағы жұмыстарды рет-ретімен баяндады.
Аудандық полиция бөлімінің бастығы, полиция полковнигі Ғани Тұрсекеевтің сөзінше, Бесарық және Көктебе ауылдық округіне жақын маңда блок-пост қойылды. Онда полиция қызметкері көлікті тоқтатса, дәрігерлер жолаушының температурасын тексереді. Ал басқарма маманы жолаушының қайда баратыны жөнінде ақпарат алып, анкетаны оның тоқтайтын жеріндегі пунктке жолдайды.
Жаңақорған аудандық тауарлармен көрсетілетін қызметтердің сапасы мен қауіпсіздігін бақылау басқармасы басшысының міндетін атқарушы Шынар Айдарова:
– Қызылорда қаласында коронавирус анықталған екінші науқаспен қарым-қатынаста болған жаңақорғандық азаматты бақылауға алып, тексердік. Нәтижесінде одан да инфекция белгілері анықталып, ауруханаға жатқызылды. Қазір онымен байланыста болған адамдарды тексерудеміз, – деді.
Қадірлі жерлестер, сақтансаң, сақтаймын қағидасын ұстанып, сақтық шараларын күшейтетін кез келді. Оның ең тиімді жолы – қоғамнан оқшаулану.
Қазір Италяида 97689 адамнан SARS-COV-2 (COVID-19) вирусы анықталып, оның 10779-ы қайтыс болды. Италия коронавирустың табиғи ошағы болмағанымен, адам өлімі бойынша әлемде бірінші орында тұр. Оның басты себебі – тәжтажалдан сақтануға немқұрайлы қарап, сақтық шараларына мән бермеді.
Сабақ алайық, ойы озық оқырман!
Нұрлат БАЙГЕНЖЕ.
