Азаматың – айнаң!
Марапат – тұлғаның мерейін асырады, тұлға – марапаттың дәрежесін көтереді. Сондай оқиғаға облыс орталығының төрінде өткен салтанатты жиында куә болдық. «Халық қаһарманы» Тохтар Әубәкіровке «Қызылорда облысының Құрметті азаматы» атағы Тәуелсіздік күні қарсаңындағы алқалы жиында табысталды. Тарихи сәтте жиылған қауым тұрып қошеметтеп, зор ықылас-ниет танытты. Адам рухын асқақтатқан мерекелік шарада қызылордалықтардың жанарынан «қуаныш жасы» тамып, шынайы қуана алды.
Одан бөлек, трансшекаралық өзендерге, оның ішінде Сырдария суына ерекше еңбегі сіңген атақты мұраб, бүгінгі күні Қазақ суы саясатын құру жолында аянбай білім, білігі, тәжірибесін қалтқысыз арнап жүрген Нариман Қыпшақбаев пен елдің сөзін биік-биік мінберлерде сөйлеп, мемлекеттік мұрат жолында аянбай еңбек етіп жүрген сенатор Мұрат Бақтиярұлына да осындай құрмет көрсетілді.
Иә, Тәуелсіздік күні қарсаңында аудан азаматтары мемлекеттік наградамен марапатталып, сүйінші жаңалықтар көбейе түсті.
Бұл қатарда «Парасат» орденімен Бақдәулет Махашов наградталғанын айту керек.
Облыстық мәслихаттың депутаты Бақдәулет Еркінбекұлының елге сіңірген еңбегін жаңақорғандықтар жақсы біледі. Кәсіпкер ретінде бір ауданның ғана емес, Сырдың бірнеше ауданының әлеуметтік-экономикалық әлеуетін көтеруге үлес қосып, жұмыс орындарын құрып, ауылшаруашылық өнімдерін өндеуге дем беріп келеді. Бүгінде «Жан-Арай» ЖШС «Батыс Еуропа – Батыс Қытай» халықаралық жолының Төменарық ауылдық округіне бұрылатын тұсында сервистік кешен құрып, қомақты инвестиция құйды.
Тағы бір қуантарлық жаңалық – елге белгілі кинорежиссер Қалила Омаровқа «Құрмет» ордені табысталды. Ұлттың тарихын танып, елдік жолда қызмет еткен ерлерді ұлықтауда Қалила Нематұлының сіңірген еңбегі мол. Әсіресе, оның алаштану іліміне қосқан үлесін ерекше атау керек. Ұлт рухы мен мәдениетінің дамуына үлес қосып жүрген документалист, кинорежиссердің мемлекеттік орденді алуы өте құптарлық іс.
Аудандық мәслихаттың депутаты Әлібек Нәлібаевтың омырауында «Құрмет» ордені жарқыраса, аудандық мәслихат депутаты Серік Мырзабаевке «Ерен еңбегі үшін» медалі табысталды. Ауданның өсіп-өркендеуінде бұл екі азаматтың өзіндік орны бар. Бүгінде Әлібек Мәшбекұлы мен Серік Абдужаппарұлы ауылшаруашылығы және кәсіпкерлік саласының даму жолында еңбек етіп, қайырымдылық істерімен көпке үлгі болып жүр.
«Шапағат» медалімен аудандық аурухананың бас дәрігері Яхия Шорабаев марапатталды. Жер-жаһанға коронавирус тарап, елде карантиндік жағдай жарияланып, елдің амандығы үшін медицина мамандары жауапкершілікті алған кезде Яхия Қадірбекұлы аудандағы жағдайдың тұрақталу жолында атқа мініп, қалтқысыз еңбек етті.
Азаматың – айнаң демей ме? Яғни біз елдік істе белсенді, беделді, білікті, білімді азаматтармен мақтанамыз. Сол тұлғалардың тұғырлы орны Тәуелсіздік күні қарсаңында лайықты бағаланып жатқаны қуантты.
ТҮЙІН. Мақала басында айтқандай, мемлекеттік наградалар мен тұлғалар бір-бірін толықтырып, жарасып-ақ тұр. Солай емес пе, қадірлі оқырман!
Нұрлат БАЙГЕНЖЕ
