Еңселі елдің ертеңі
Елдің болашағы білімді, белсенді ұрпақ қолында. Сондай рухани бай, білімді жастар қатарына №3 мектеп-интернатының 11 сынып оқушысы Еркежан Рамашты қосуға болады.
Кішкентайынан анасына еліктеп ол ұстаз болуды мұрат етті. Осы жолда кейіпкеріміз бар ықылас-ынтасын ілім-білім жинауға сарп етуде.
– Әрбір жеке тұлғаның өз болашағы алдымен отбасында, одан әрі мектебінде қалыптасып, шыңдалады. Ал мектепте алған білімің әлемді танудың алғашқы іргетасы. Ертең осы елдің тізгінін ұстап, жаңа мақсаттарға қол жеткізуде мектепте алған білімің септігін тигізеді. Сондықтан ұстаздардың төккен терін ақтау шәкірт үшін міндет, – дейді Еркежан.
Оның сөзінше, төтенше жағдай енгізілгелі қашықтан оқуда ұстаздар қауымы түлектерге көп салмақ салмай, бар уақытын ҰБТ-ға дайындық барысына жұмсауға кеңес беруде. Сондықтан бар ынта-жігерімізді тест тапсырмалары берілген кітапшалар мен басқа да оқулықтар оқу арқылы жетілдіруде. Ал мақсаты – қазақ тілі мен әдебиеті пәнінің мұғалімі болу.
Бос уақытысында Абайдың поэмаларын, қара сөздерін, Оралхан Бөкей және Тахауи Ахтановтың повестерін оқуға арнаған кітапқұмар жастың жан дүниесі рухани бай, шығармашылыққа жақын. Кітап оқуға, оны құрылымдық жағынан талдап, жаңашылдықпен салыстыруда ұстазы Гүлнәр Әлібекованың көп көмегі тигенін айтады. Түрлі байқаулар мен жарыстарға қатысып жеңімпаз атануы да осы тәлімгерінің арқасында екенін мойындайды. Мәселен, Алматы облысының білім басқармасы ұйымдастырған Республикалық олимпиадада үшінші орын, «Білімнің түскен жолына, ғылымның шығар шыңына» атты өткен апталықта «ХХІ ғасыр көшбасшысы» атанса, Халықаралық «Русский медвеженок-языкознание для всех» байқауы мен Қанипа Бітібаева атындағы қазақ тілі мен әдебиетінен оқушылар арасында өткен республикалық олимпиада және «On the way to a dream» атты ағылшын тіліннен өткен ғылыми жоба байқауында екінші орын алады. Тізбектей берсең бағындарған белесі жетерлік.
Өзін жан-жақты дамытқысы келетін Еркежан сонымен қатар орыс тілі мен ағылшын тілін де жетік меңгерген. Өзге тілде еркін сөйлейтін кейіпкеріміз осы қырымен де таң қалдырды. Ақпараттық технолгия дамыған заманда кейіпкеріміздің артта қалғысы жоқ. Содан болар үнемі жаңашыл бағадарламаларымен сабақ барысын қызықты етіп өткізетін мұғалім мамандығын таңдапты. Өйткені мұғалім ең мәртебелі, құретке лайық мамандық екенін жақсы біледі.
– Мектеп – өмірлік дағды-әдеттерді сіңіретін орта. Осы өнеге мектебінде Еркежан ізденімпаздылығымен, білімқұмарлығымен көптен ерекшеленеді. Ол зерек оқушының бірі. Мектеп-интернатымызды «Алтын белгіге» бітіргелі отырған үздік шәкірт. Осындай оқушыларымызбен мақтанамыз, – деді мектеп-иентернат директоры Ләззат Нәлібаева.
Бүгінгі техника мен технология дамыған заманда білім мен ғылым бәсекесі күн өткен сайын артып келеді. Сондықтан кез келген жас жанына жақын мамандықты таңдап алып, оны терең зерттеу мүмкіндігіне ие. Сондай жолда Еркежанға тілеріміз тек қана сәттілік!
Лаура БИБАСАРОВА
