Өткен жылдың жемісі
Жаңақорған өңірі – мәдениетпен мерейленіп, өнермен өрістеген киелі өлке. Қасиетті топырағы талай мәдениет майталмандары мен өнер жұлдыздарының алтын бесігіне айналды. Міне, осындай өнері өрістеген өлкенің өткен жылғы жұмыстарын қорытындылауға арналған «Өнер – мәңгілік мұра» атты шығармашылық кештің куәсі болдық. Есепті шараны тамашалауға келген халықтың қарасы да көп. Күмбірлеген күй, әуезді әнмен рухани сусындап қайттық.
Аудандық мәдениет үйінің кіреберіс фойесіне көркемөнерпаздар үйірмелерінің туындылары және А.Сопыбеков атындағы аудандық кітапхана ұжымы дайындаған тақырыптық көрме таныстырылды. Сахнада суретші эскизі бойынша безендірілу ерекше стильде жасалған. Сахна шымылдығы түрілген сәтте «Айсыновтар» халықтық отбасылық ансамблінің орындауында бірнеше күй домбыра шанағынан төгілді. Жергілікті композитор Бәден Айсыновтың күйі «Егемен Қазақстан», Сүгірдің күйі «Ыңғай төк» орындалғанда көрермендер бір деммен тыңдады
Мәдени шарада сөз алған аудан әкімі Мұрат Тілеуімбетов мәдениет қызметкерлерінің жұмысына, өнер көкжиегінің кеңеюіндегі табанды еңбектеріне алғысын жеткізді.
– Мәдениет пен өнер – елдің рухани байлығы, сарқылмас қазынасы. Біздің өнерлі өрендеріміз аудан абыройын асқақтатып, мерейімізді тасытып, биік додаларда топ жарып келеді. Үздік мамандар елдің руханиятына сүбелі үлесін қосып, іргелі ел болуға жалынды жылдарын арнауы – адамгершілік қасиет дер едім, – деді аудан басшысы.
Өңір мәдениеті мен өнерін өрістету жолында аянбай тер төгіп жүрген сала қызметкерлерін марапаттау рәсімі айрықша көңіл күй сыйлады. «Үздік клуб кәсіпорны» номинациясымен «Қожакент ауылдық клубы» коммуналдық мемлекеттік қазыналық кәсіпорны, «Үздік ауылдық кітапхана» номинациясымен Бірлік ауылдық кітапханасы марапатталды. Сунақата ауылдық клубының сүйемелдеушісі Мұхит Әбенов, М.Көкенов атындағы аудандық мәдениет үйінің әдіскері Айсәуле Қияс, М.Нәлібаев ауылдық клубының сүйемелдеушісі Бекарыс Шүкір, Қандөз ауылдық клубының сүйемелдеушісі Сұлтан Нұрбаев, аудандық орталық кітапхананың кітап қорын толықтыру және өңдеу бөлімінің редакторы Нысанкүл Шалапова, аудандық орталық кітапхананың шаруашылық меңгерушісі Ахметжан Маханов, Кейден ауылдық кітапханасының кітапханашысы Шәмшат Әлжанова, Қожакент ауылдық кітапханасының кітапханашысы Алмагүл Рүстемова, аудандық орталық кітапхананың кітапханашысы Жаханова Әсия М.Көкенов атындағы аудандық мәдениет үйінің әдіскері Гүлсінай Қарақбай аудан әкімінің «Алғыс хатымен» марапатталды.
Жергілікті ақын Ерсұлтан Мұстафаевтың сөзіне жазылған Мейрамбек Мырзахметовтің «Жаңарған Жаңақорған» әні шырқалғанда көңілімізде туған жерге деген ыстық сезімнің оты лаулады.
«Батырлар биімен» мың бұрала шыққан «Аққу» би тобының өнерпаздарына елдің қошеметі ерекше болды. Бір топ әншілердің орындауындағы сазгер Бексұлтан Байкенжеевтің әндерінен попурри шырқалғанда көрермен құрмет білдірді. Мәдениет майталманы Жақсыгүл Бегманова атындағы «Ақ әжелер» ансамблі халық әні «Угәй-ай» әнін ерекше нақышта орындады. Бәкір Тәжібаев «Ақбұлақ» әнін заманауи сарында орындаған әншілер Мұхит Әбенов пен Аманжол Сламовтың ізденімпаздығы байқалды. Халық әні «Дүние-ай» әнін орындаған «Асылбековтер» және «Омаровтар» отбасылық ансамблінің өнеріне ел тәнті болды. Ешнияз салдың әні «Дүрдараз» әнін жаңа бағытта шырқаған жас әншілер тобының өнері нағыз кавер нұсқа болды.
Кешті сазгер Дүйсенхан Сыздықовтың «Жаңақорған» әні қорытындылады. Мәдениет пен өнердің ордасы, өркен жайған сәулетті де дәулетті туған өлкеміз – Жаңақорғанның мәдениеті мен өнері мәңгілік жасай берері сөзсіз. Киелі атамекеннің өнері мен салт-дәстүрі әр азаматқа аманат.
Мақпал МАРҚАБАЙ
