Асылдың сынығы
Қазақта «Асылдың сынығы» деген әдемі тіркес бар. Өнер әркімге қона бермейтін бақ. Сондай бақтың біріне Сырым Манапты жатқызуға болады. Оның бір басына Жаратушы сан өнерді дарытыпты. Олай демей ше, ол төл аспаптан бөлек, гитара, фортапиано, домбыра примада, контрабаста еркін ойнайды. Талантты жастың талабы да таудай – өз ауылында оркестр құрмақшы.
– Мен күй ойнап, ән қалықтаған, ақындығы бір төбе шаңырақта өмірге келіппін. Манап Көкеновтың немересі ретінде өнерден өз еншімді алуым тиіс. Осы бағытта талаптанып, еңбектеніп келемін. Атамның асыл бейнесіне кір келтірмеу менің азаматтық борышым, – дейді жас талант.
2013-2017 жылы Қызылорда қаласындағы Қазанғап атындағы музыкалық мектепте білім алғаннан кейін туған жерінде қызмет етуге бел буады. Алғашында домбыра, гитара, пианинодан үйірме сыныбын ашып, кейін мәдени ұйымдастырушы болып ауылдан халық аспаптар оркестрін құруды басты мақсаты санайды.
– Бүгінде таланты жастар жетерлік. Солардың басын қосып өнерге баулысам, ауылдың атын шығарып, өнердің дамуына үлес қоссам деймін. Маған әрдайым әкем Убайдулла мен анам Бақыт қолдау көрсетеді, – дейді ол.
Талантты жас қамқорлық көрсетіп жүрген әріптес аға-әпкелерінде тілге тиек етті.
– Осы мәдениет саласында қызмет еткелі аудандық мәдениет үйінің директоры Зүлфия Шалабаева бағыт-бағдар көрсетіп, шынайы жанашырлық танытып жүреді. Оның белсенділігінің арқасында облыстық, республикалық байқаулар аудан төрінде өткізіле бастады. Әсіресе жастармен жұмыс жасап және жастарға жол көрсетіп, мәдениет саласының қыр-сырына баулып жүреді, – деп өнердегі қолдаушысы жайлы айтты.
Сырым Манаптың жетістігі бір төбе. «Үздік жас маман» облыстық байқауында олжа алды. «Үздік жас маман» аудандық байқауында оза шауып, бас жүлде алып, «Көнеден жеткен күй күмбір» атты аудандық күйшілер байқауында дараланды.
Бүгінде «Қаратау қазынасы» халықтық фольклорлық ансамблінің мүшесі.
Үйірмедегі жетістіктеріне тоқталсақ, «Күй атасы – домбыра» атты аудандық домбырашылар байқауында үйірме мүшесі Маржан Әбдіманап жүлдегерлер қатарынан көрінді. Домбырашылар ансамблі аудандық «Жас талант» байқауында үшінші орынды иемденді.
«Бір өзі – бір театр» атанған халық ақыны Манап Көкеновтің немересі Сырымның алға қойған мақсаттары жетерлік. Ешкімге еліктемей, өнер жолында өзіндік жол қалдырсам деген оның тума дарындылығы, ақынжандығы өнерге адалдығы оның ішкі жан дүниесін айнадай ашып береді. Жас таланттың бағындырар биіктері әлі алда. Біз оған өнер жолындағы қанатың талмай, тек биіктен көрін деп тілейміз.
Әйгерім МЫРЗАХМЕТОВА
