Қызылордада интернет дүкендер желісі елуден асқан

Бұл туралы бүгін Өңірлік коммуникациялар қызметінің ақпараттық алаңында өткен брифингте облыстық кәсіпкерлік және туризм басқармасының басшысы Фердоуси Қожабергенов мәлімдеді.
Мемлекеттік кірістер департаментінің ресми мәліметтеріне сәйкес, облыста 51 интернет-дүкен жұмыс жасауда, оның ішінде жыл басынан бері 21-і тіркелген.
«Қызылордада кәсіпкерлер арасында интернет-дүкендер арқылы сатуды ұйымдастырудың артықшылықтары туралы түсіндіру жұмыстары жүргізілуде. Біз жыл соңына дейін облыста 8 интернет-дүкендерін ашуды көздеп отырмыз»,– дейді басқарма басшысы Фердоуси Қожабергенов.
Өңірде «Сауданы дамыту» жобасының «Сауда саласын жаңғырту» бағыты бойынша салалық орталық мемлекеттік органдармен бірге нақты жоспар бекітілген. Жоба аясында 4 сауда базарын заманауи форматтағы сауда нысандарына көшіріліп, заманауи форматтағы 4 сауда нысаны іске қосылады.
Айта кету керек, күні бүгінге дейін шағын және орта кәсіпкерлік субьектілерінің саны 44225-ке жеткен. Сәйкесінше 1446 шағын және орта кәсіпкерлік нысаны тұрақты жұмыс жасап тұрғандығын растайтын статус алған.

Ескендір Ертай