ӘКІМДЕР ЕСЕБІ: ШАЛҚИЯНЫҢ ШАРУАСЫ ТҮЗЕЛІП КЕЛЕ МЕ?

Биылғы есеп беруде жұмыссыздық мәселесін қозғағандардан гөрі алғыс айтушылар көп болды. Жылдағы әкім есеп беруінде «жұмыс керек» дейтін шалқиялықтардың қарасы аз болды.

Әкімі жиі ауысатын шалқиялықтардың жаңа басшысы Әбдімәулен Сабырханов жылды жақсы жаңалығымен қорытты. Әсіресе, салық түсімі жақсы, қазынаға 6 237 000 теңге құйылған. Яғни, болжамнан 117 пайызға орындалғанын көрсетеді. Тек жер салығы ғана төмендеу. 669 дара кәсіпкер болса, соның 12-і салық есептілігін тапсырмаған. Десе де, 2018 жылы жастарға қолдау көп болды. «Zhasprojekt» арқылы 6 жоба жеңімпаз атанды. Сондай-ақ, өндіріс ошағы арқылы жасыл алаң мен балалар ойнайтын алаңқай бой көтерді.
Айта кетейік, жиынға «ШалкияЦинк LTD» АҚ бас директоры Асқар Амангелдіұлы арнайы қатысып, тұрғындар сұрағына жауап берді. Енді тұрғындарды алаңдататын мәселелерге көшсек.
Тұрғындар кентке қажетті мәселелерді рет-ретімен сұрады. Бірінші, білім саласы, яғни, кенттегі жалғыз мектепке жөндеу керек дейді. Шынында, білім ошағы тым ескі. Аудан әкімінің орынбасары Адай Салыбеков биыл жөндеу жұмысына 5 млн. астам қаржы қаралатынын жеткізді. Балабақша мәселесі де шешіліп жатса құба құп...
Зауыттың бас директор шалқиялық тұрғындарға жағымды жаңалығын жеткізді. Яғни, маусым айында кентке көгілдір отынды жеткізу үшін монтождау жұмыстары жүргізілетінін айтты...
2019 жылы атқарылатын жұмыстар аз емес. Бастысы сол жұмыссыздықты азайту, екінші жолдарға асфальт төсеу. Әсіресе, Шалқия мен Құттықожаны жалғайтын аралықтағы тас жолды асфальттау маңызды. Кентте кәсіпкерліктің өрісін кеңейтіп, Құттықожада ауылшаруашылық бағытында біршама жұмыстар атқарылмақ...