ҚҰРЫЛЫСЫ ҚАРҚЫНДЫ ҚЫЗЫЛОРДА

Биылғы жылдың өзінде Арал, Қазалы, Қармақшы, Жаңақорған ауданындағы апаттық жағдайдағы 11 мектеп құрылысы жаңадан жүргізілген. Одан өзге республикалық бюджет есебінен бүгінде облыс бойынша 300 орындық 5 мектеп құрылысы жүруде. Ең бастысы, аймақта үш ауысымдық білім беру проблемасы толық қанды шешілді.
Алаштың анасы атанған Сыр өңірі ауқымды құрылыс алаңына айналды. Биылғы жылы Қызылорда қаласында 61 көпқабатты тұрғын үй құрылысы жүргізілуде. Оның ішінде, жеке инвесторлар өз қаржысы есебінен 957 пәтерлік 24 көпқабатты тұрғын үй, мемлекеттік бағдарлама арқылы 2014 пәтерлі 37 көпқабатты тұрғын үй салынуда. Бүгінге дейін соның ішінен 34 көпқабатты тұрғын үй пайдалануға беріліп, 230 отбасы баспаналы болған. Әсіресе, «Нұрлы жер» бағдарламасы аясында 11 жаңа шағын аудан бой көтерген.