Кітап – адамзаттың рухани қазынасы

Кітап – адам баласының сан ғасырлық ақыл-ойынан туған ең асыл мұралардың бірі. Ол – уақыттың үнін, дәуірдің тынысын, халықтың арман-мұратын, адамның ішкі әлемін сақтап тұрған рухани қазына. Кітап беттерінде өткеннің өнегесі, бүгіннің шындығы, келешектің үміті тоғысады. Сондықтан кітапты жай ғана қағазға басылған мәтін деп қарау – оның шын қадірін түсінбеу. Кітап – адамды тәрбиелейтін ұстаз, ойды оятатын серік, көңілді байытатын сырлас

Адам өміріндегі кітаптың орны қашанда айрықша. Ол – адамзат баласының таным көкжиегін кеңейтетін, сөздік қорын байытып, ой-санасын кемелдендіретін рухани қазына. Кітапқа жақын жан өмірге үстірт қарамайды; әр құбылыстың тереңіне үңіліп, жақсылық пен жамандықтың, адалдық пен арамдықтың, ізгілік пен қатігездіктің ара-жігін ажырата біледі. Әсіресе көркем әдебиет адам жүрегінің ең нәзік пернелерін тербеп, жан дүниесіне ерекше әсер етеді. Шығарма кейіпкерлерінің тағдыры арқылы оқырман өз өміріне көз жүгіртеді, бірде қуанып, бірде мұңайып, бірде терең ойға шомады. Шын мәнінде, жақсы кітап – адамның ішкі әлемін байытып, жүрегіне сәуле түсіретін, өмірге деген көзқарасын жаңарта алатын құдіретті күш.
Кітап – ұлт руханиятының да айнасы. Әр халықтың тарихы, салт-дәстүрі, мінезі мен мәдениеті кітап арқылы ұрпақтан-ұрпаққа жетеді. Қазақ халқы да сөз өнерін ерекше қадірлеген. Абайдың қара сөздері, Мұхтар Әуезовтің шығармалары, Ілияс, Сәкен, Мағжан, Ғабит, Ғабиден сынды қаламгерлердің туындылары – халқымыздың рухани биіктігін көрсететін асыл дүниелер. Мұндай шығармаларды оқу арқылы жас ұрпақ туған тілінің көркемдігін сезінеді, елін сүюді, адамды құрметтеуді, өмірді бағалауды үйренеді.
Қазіргі заманда ақпарат көп, бірақ терең ой азайып бара жатқандай көрінеді. Әлеуметтік желі мен қысқа мәтіндер адамның назарын тез тартады, алайда олар кітаптың орнын толық баса алмайды. Кітап адамды сабырға, жүйелі ойлауға, терең түсінуге үйретеді. Кітап оқыған сайын адам өзімен-өзі сырласады, ішкі әлемін байытады. Сол себепті кітап оқу мәдениетін қалыптастыру – әрбір отбасының, мектептің, қоғамның маңызды міндеті.
Кітапты сүйген адам ешқашан рухани кедей болмайды. Өйткені кітап оның жүрегіне ізгілік дәнін себеді, санасына білім шырағын жағады. Ол адамды биік мақсатқа жетелейді, өмірдің мәнін түсінуге көмектеседі. Кітап оқыған ұрпақ – ойлы ұрпақ, ал ойлы ұрпақ – елдің болашағы.
Қорыта айтқанда, кітап – адамзатқа берілген ұлы сый. Ол – білімнің бұлағы, тәрбиенің қайнары, рухани кемелдіктің жолы. Кітапты қадірлеу – білімді, мәдениетті, саналы қоғам қалыптастырудың негізі. Сондықтан әрбір адам кітапты өмірлік серік етіп, оның терең әлемінен өзіне қажет нәр алып отыруы керек. Кітап бар жерде ой бар, ой бар жерде даму бар, ал даму бар жерде жарқын болашақ бар.

                                                                                                                                  Шамат Ұлбосын Ғазизқызы