БАЛАНЫ МЕКТЕПКЕ ДАЯРЛАЙЫҚ

“AMANAT” партиясы Жаңақорған аудандық филиалы аудан көлемінде игі дәстүрге айналған “Баланы мектепке дайындайық” республикалық акциясын ұйымдастырды. Бұл бастама – жаңа оқу жылы қарсаңында әлеуметтік жағынан аз қамтылған және көпбалалы отбасылардың балаларын мектепке қажетті құрал-жабдықтармен қамтамасыз етіп, олардың білім алу жолындағы алғашқы қадамына қолдау көрсетуге бағытталған.
Филиал төрағасы Арман Мажитов жиналғандарға арнаған сөзінде білімнің – елдің болашағына салынған ең маңызды инвестиция екенін атап өтті. Ол: «Бүгінгі балалар – ертеңгі ел тұтқасы. Олардың сапалы білім алып, жан-жақты дамуы – біздің ортақ міндетіміз. Сондықтан әр баланың мектепке толық дайын болып баруына қоғам болып үлес қосуымыз қажет», – деп, акцияға қолдау көрсеткен азаматтарға алғысын білдірді.
Шара барысында ауданның түрлі елді мекендерінен келген оқушыларға сөмкелер, дәптерлер, қалам-қарындаштар, оқу-әдістемелік құралдар және спорттық жабдықтар табысталды. Балалардың жүзіндегі қуаныш пен ата-аналардың ризашылық көңілі акцияның басты нәтижесі болды.
“AMANAT” партиясының бұл игі бастамасы аудан көлемінде әлеуметтік жауапкершілікті арттыруға, қоғамда мейірім мен қамқорлық мәдениетін қалыптастыруға зор үлес қосып келеді.