«Қайырымдының қолы ұзын, жақсылықтың жолы ұзын» дейді халық даналығында. «Жерде бір бала қуанса, көкте мың періште шаттанады». Осы аталы сөз бүгінгі қоғамның келбетіне айнала бастағандай. Жаңа оқу жылының басталуына санаулы ғана күндер қалып, алғашқы қоңырау мерекесі қарсаңында мектепке дайындалып жүрген балаларға қуаныш сыйлауға «AMANAT» партиясы да ат салысуда. Жаңақорған аудандық партия филиалында «Бақытты отбасы» партиялық жобасы аясында «Баланы мектепке даярлайық» акциясы ұйымдастырылып, жаңа оқу жылы қарсаңында 50 балаға оқуға қажетті құрал-жабдықтар мен сөмкесі табысталды.
Аудандық партия филиалының төрағасы Арман Әбілпейсұлы : «Жылдағы дәстүрге сай биыл да «Баланы мектепке даярлайық» акциясын ұймдастырып отырмыз. Біздің мақсатымыз – болашақ елдің тірегі жас талапкерлерге оқуда озат болып, елдің көшін алға сүйрейтін алып тұлға болсын деген ізгі ниет ғана. Сондықтан әрбір оқушының талабын жанып, жігерін қайрап, үмітін үкілеп, оқуға деген ынтасын арттырғымыз келеді. Әрбір оқушының жаңа оқу жылына тыңғылықты дайындықпен баруына ұйытқы болсақ, бұл біздің еліміздің болашағаына қосқан үлесіміз! , – деді.
Періште пейілді балалардың жанарынан қуанышты көру қандай ғанибет! Олар – біздің болашағымыз. Балалардың көңіліндегі қуанышты көрген ата-аналар да алғыстарын жаудырды.