ТУ ТҰҒЫРЫ – ТАТУЛЫҚ СИМВОЛЫ

Жеңістің 80 жылдық мерекесі аясында, ҰОС-ның тыл ардагері Кәрім Жұмабаевтың туғанына 90 жыл толуына орай ұрпақтарының ауылға тартуы «Ту тұғырының» ашылу салтанаты өтті. Іс-шараға аудан әкімінің орынбасары Бектас Нуридинов, Қазақстан Республикасының Мемлекеттік Елтаңбасының авторы Жандарбек Мәлібеков, ел ағалары және ауыл тұрғындары қатысты.

Ауыл төріндегі мерекелік кеш еліміздің өнер майталмандарының орындауындағы патриоттық әндермен басталды. Елдің жүрегінен орын алған Үкітай Ерниязов, Әл-Фараби Бекарысұлы, Махамбетәлі Бекпейсов, Нурислам Тлеухан бастаған өнерпаздардың өнері көпшілікті сүйсінтті.
Салтанатты рәсім барысында аудан әкімінің орынбасары Бектас Балғабайұлы тұрғындарды «Тағзым» алаңының ашылуы­мен құттықтады.
– Бүгін Төменарық ауылы үшін та­ри­­хи әрі тағылымы терең күн. Ел­ді­гіміз­дің, Тәуелсіздігіміздің айғағы са­на­ла­тын қасиетті Мемлекеттік рәміз­де­рі­­міз­ге арналған Ту алаңының ашы­луы – ынтымағымыздың белгісі. Тәуелсіз Қазақс­танның айбынын асырып, мерей­ін өсіретін Елтаңба, Ту және Әнұран – халқымыздың жүрегінен орын ал­ған қастерлі құндылықтар. Мемлекеттік рәміздер – бұл елдік пен егемендіктің, бірлік пен рухтың нышаны. Сондықтан бүгін біз өткенімізге тағзым етіп, болашаққа бағдар берер бұл нысанды ауыл жастарына, келер ұрпаққа тә­лім-тәрбие беретін маңызды мәдени-рухани орын ретінде ашып отыр­мыз. Осы игі бастаманың салтанатына арнайы қатысып отырған, Қазақстан Республикасының Мемлекеттік Елтаң­ба­сының авторы, еліміздің құр­метті азаматы, сәулет өнерінің шебері Жан­дарбек Мәлібековке зор ризашы­лы­ғымызды білдіреміз. Сіздің еңбегіңіз – тек сәулет өнерінің ғана емес, тұтас ұлт руханиятының асыл мұрасы, – деді ол.
Сондай-ақ, осы кеште ауылдың әлеу­меттік-экономикалық дамуына үлес қос­қан бірқатар азаматтарға аудан әкімінің «Алғыс хатын» табыстады.
Ұлағатты ұстаз, Ұлы отан соғысының тыл майдангері, Қазақстан Республи­касы Журналистер одағының мүше­сі, Жаңақорған ауданының «Құрметті азаматы» Кәрім Жұмабаев атамыз­дың туғанына 90 жыл толуына орай ұрпақтарының ауылға тартуы ретін­де ұсынғалы тұрған «Ту тұғырының» аллеясының ашылу салтанатында ел ағалары мінбер төріне шақырылды. Қазақстан Республикасының Мемле­кеттік Елтаңбасының авторы, мемле­кет қайраткері, «Барыс» орденінің ие­гері, Еуразия ұлттық университеті­нің профессоры, құрметті сәулетші, жерле­сіміз Жандарбек Мәлібекұлына сөз кезегі берілді.
– Мемлекеттік Рәміздер – мемлекет­тің тәуелсіздігін білдіретін символика­лық айырым белгілері. Мемлекеттік рәміз­дер тәуелсіздік нышаны ретінде ерек­ше қадірленіп, оларға биік мәртебе бері­леді. Мемлекеттік Рәміздер – елдігіміздің кепілі. Төменарықтық ағайындардың «Ту тұғырын» орнатып, бірлігімізді одан әрі нығайта түскені мені шын қуантты. Осындай елшіл азаматтардың игі істері жалғасын таба берсін, – деген ақжарма тілегін жеткізді.
Шара барысында Мемлекеттік Ел­таңба авторы Жандарбек Мәлібек­ұлы­на құрмет көрсетіліп, иығына қазақы дәстүрге сай шапан жабылды. Мемле­кеттік Гимн орындалып, бейбіт­шілік пен бірліктің нышаны – көк Ту көкке көтерілді.
Спорт шебері, бокстан Қазақстан Рес­публикасы Қарулы Күштерінің 4 дүркін чемпионы, Қазақстан Рес­пуб­ли­касы Қарулы Күштерінің гір спор­тынан 2 дүркін чемпионы Қазақ­стан Республикасының Қорғаныс ми­нис­тр­лігінің полковнигі Мейіржан Жұмабаев­қа арнайы сөз беріліп, жылы лебізі тыңдалды:
– Бүгінде Төменарық ауылы – ауда­нымыздағы қарқынды дамып келе жатқан елдімекендердің бірі. Өткен жылы аймақ басшысы Нұрлыбек Мәшбекұлы Нәлібаевтың тікелей қол­дауымен ауылға көгілдір отын келіп, көптен күткен маңызды мәселе шешімін тапты.
Сонымен қатар ауыл тұрғындары­ның денсаулығы – басты назарда. Осы ретте 50 орындық жаңа аурухана мен ауылдық амбулаторияның салынуы – медициналық қызметтің қолжетімділігін арттырып, тұрғындар өмірінің сапасын жақсартуда.
Ауызсу, жол, инфрақұрылым мәсе­лелері де кезең-кезеңімен оң шеші­мін тауып келеді. Бұл – Ел Президенті Қасым-Жомарт Кемелұлы Тоқаевтың бастамаларымен жүзеге асып жатқан «Халық үніне құлақ асатын мемлекет» қағидатының нақты көрінісі.
Ал бүгінгі ашылып отырған Ту алаңы тек көркем нысан ғана емес, елдігіміз­ді ұлықтайтын, ауылдың патриоттық рухын көтеретін, жас ұрпаққа елін, жерін сүюге баулитын маңызды орын болады деп сенемін. Бұл игі істің жүзе­ге асуына үлкен демеушілік көрсет­кен бауырым, Жұмабаев Қайрат Кәрімұлына өз атымнан және ауыл жұртшылығы атынан ерекше алғысымды білдіремін, – деді ол.
Айта кету керек, Мемлекеттік Ту алаңы – жергілікті кәсіпкер Қайрат Кәрімұлы Жұмабаевтың демеушілігімен бой көтерген нысан. Бұл игі іс – ұлағатты ұстаз, Қазақстан Журналистер одағы­ның мүшесі, Жаңақорған ауданының «Құрметті азаматы» Кәрім Жұмабаевтың 90 жылдық мерейтойына орай ауылға жасалған тарту болды.
Қайрат Кәрімұлы өз қаржысынан 10 миллион теңге бөліп, туған ауылы­на көрік беретін, көпшілікке ортақ әсем аллеяны салып беріп отыр. Бұл – нағыз азаматтықтың, туған жерге деген жанашырлықтың үлгісі.
Көпшілік бас қосқан мерекелік шара­да Төменарық ауылының қауымдастық төрағасы Орынбасар Әзиз­ұлы, Кәрім Жұмабаев атамыздың ту­ыстары, Кәрім атамыздың ұлы Қайрат Жұмабаевтар жылы лебіздерін білдірді.

ТҮЙІН. Мемлекеттік рәміздер – елі­міздің дербестігі мен тәуелсіздігін күллі әлемге жария етуші әрі мемлекетіміз­дің өткені мен бүгіні, болашағы ара­сын­дағы сабақтастықтың жарқын бей­не­сі. Халқымыздың рухын, ұлттық салт-санасын, қаһармандығы мен дана­лы­ғын, болашаққа үмітін, арман-тіле­гін жеткізетін ерекше құнды белгілер қатарының артуы – татуылығымыздың айқын белгісі.

Мақпал МАРҚАБАЙ