Аққұм елді мекеніндегі ағайынның жайы

Бүгін Қызылорда облыстық мәслихат депутаттары Жанкелді Ойшұлы, Аида Абибуллаева, Облыстық қаржы және экономика басқармасының бөлім басшысы Әбиева Шынар, Облыстық білім басқармасының маманы Демес Шалқар Жаңақорған ауданына іс сапармен келіп, аудандық мәслихат төрағасы Ғалымжан Жарқынбекұлы, Жаңақорған ауданы әкімінің орынбасары Бектас Балғабайұлы және «AMANAT» партиясы аудандық филиалының төрағасы Арман Әбілпейісұлы бастаған аудандық партиялық бақылау комиссиясының мүшелерімен бірге «Облыстық орта және мектепке дейінгі біліммен қамтамасыз етудің сапасы туралы» мәселеге байланысты аудандағы орта және мектепке дейінгі білім беру мен денсаулық сақтау саласының жағдайына мониторинг жүргізу үшін Аққұм елді мекеніне барды.

Депутаттар №221 негізгі мектептің жай күйімен танысу барысында мектепке бөлінген қаржы, кабинеттердің жабдықталуы, жұмсалған қаржы, мектепті жылыту көзі, мұғалім мамандығының жүргізетін пәніне сәйкестігі, медициналық кабинеттің болуы және медбикемен қамтамасыз етілуі, ыстық тамақтың ұйымдастыру жайы зерделеніп, мұғалімдермен пікірлесіп, ой бөлісіп, біліммен қамтамасыз ету сапасын бақылады.Анықталғаны: 100 орындық мектеп 2018 жылы пайдалануға берілген, қазіргі таңда 133 бала білім алады. Мектепке 30 мұғалім дәріс береді. Ғимараттың ішкі сыртқы жағдайы жақсы. Мектепте өз алдына медбике қызметкерінің штаты қаралмаған. Мектеп басшылығы осы мәселенің шешу жөнінде ұсыныс айтты.