Су жүйелерін тазалау
– Облыстық бюджет есебінен 2024 жылы тазаланатын каналдар: М.Нәлібаев ауылдық округіндегі «К-2-6-1», «К-2-6-2-1» су қашыртқысы, Аққорған ауылдық округіндегі «Р-16-2» және «Р-16-2-1» каналы бар. Қолдау тапқан су жүйелеріне тазалау жұмыстарын жүргізу үшін мемлекеттік сатып алу арқылы жеңімпаз анықтауға құжаттары дайындалуда. Осы каналдарға тазалау жұмыстарын жүргізуге жауапты болып, теңгерім иесі «Табиғат» МКК-сі болып табылады. Аудандық шұғыл шығындары бюджеті есебінен 2024 жылы тазаланатын каналдар жоспары да бекітілді, – деді бас агроном.
Оның ішінде Сыр бойындағы каналдар бар, 8 ауылдық округтегі каналдар енгізілген. 2024 жылы күріш дақылын еккен ауылдық округтердегі шаруашылықтардың егістік жеріне су тапшылығы жағдайында 19 дана насос қондырғыларын қою жоспарлануда.
Міне, әзірге меже осылай айқындалуда. Енді 1 айдан астам уақытта дала дүбірі басталады. Ерте көктемде кетпенін иығына асынып, дән сеуіп, ала жаздай тер төгетін диқан қауымы жыл сайын ішкі өнімнің үлесін арттыруды мақсат етіп отыр.
Әлібек ТЕМІРБЕК
