"Бәйтерек" монументі уақытша жабылады

2018 жылдың 21-28 мамыр аралығында «Бәйтерек» монументі жоспарлы реставрациялық жұмыстардың жүргізілуіне байланысты келушілер үшін жабық болады, деп хабарлайды Вaq.kz ақпарат агенттігі.

"Аталған кезеңде еліміздің басты ескерткіштерінің бірінде келесідей жұмыстар жүргізіледі: конструкцияның шыны бөлігін жуу, металл тіректерді сырлау, кейбір мәрмәр элементтерді ауыстыру және ауа райының қолайсыздығының салдарынан туындаған кейбір кемшіліктерді түзету", - делінген Астана қалалық Мәдениет және спорт басқармасы баспасөз қызметінің хабарламасында.

«Бәйтерек» монументі 29 мамырда келушілер үшін қайта ашылады.
Айта кетейік, ескерткіш үзіліссіз сағат 10:00-ден 22:00-ге дейін жұмыс істейді. Кіру құны 15 жасқа дейінгі балалар үшін – 300 теңге және ересектер үшін – 700 теңге.