Жайдарман – еліміздегі ең алғашқы жастар арасындағы әзіл ойын түрі. Астары бар әзіл, саясаттың қыр-сырын күлкі арқылы жеткізу, әрбір адамның қолынан келе бермейді. Осындай әзілкештер қатарында жерлесіміз Асхат Құлтастың есімі жиі аталады. Алғашқыда Жайдарманда өнер көрсеткен ол бүгінде аудандық, облыстық, республикалық квн ойындары арқылы көпшілікке жақын таныс әрі жасөспірімдерді сахнаға баулып, талай додаларға баптап жүр. Өнерпазбен осы тақырып төңірегінде әңгімелескен едік.
– Негізі адамды жылату оңай, күлдіру қиын деп жатады. Себебі, бүгінгі бұқараны арзан күлкімен алдай алмайсың. Осы тұста, талғампаз көрерменді шынайы күлкіге қарық қылу қаншалықты қиын?
– Дұрыс айтасыз. Қазіргі таңдағы қарбалас заманда халықты күлдіру оңай шаруа емес. Елжұрттың арасында жүргенде жай жүрмей образ жинап жүреміз. Боямасыз өмірдегі қарапайым адамдардың байқамай тұрған тұсын байқап, қиялмен суреттеп сахнаға алып шығамыз. Жалпы, қазақы қалжыңның әзілі мен мысқылы, қайталанбас қағытпа сөздері сүйегіңнен өтердей өткір келеді. Өзім түрлі образда адамдардың көңіл-күйін көтеруді, көрерменнің шынайы реакциясын көруді ұнатамын. Біз үнемі ізденіп, жаттығып жүреміз. Мимика, ымишара, дикциямен жеткізе білу маңызды. Былай алып қарағанда, көрерменді күлдіру оңай секілді. Алайда, көпшіліктің алдына шығып адамдардың езуіне күлкі үйірілту оңай емес. Негізі ең қиын жанр комедия ғой. Комедияның ішіндегі әзілді алып тастасаң, драма болып шыға келеді. Адамды жылатудан күлдіру қиын.
– Ең алғаш өнер әлеміне қадамың мектеп сахнасынан басталған шығар?
– Жастайымнан қазақы қалжыңға жақын болдым. Өзім №163 орта мектепте оқыдым. Мектеп қабырғасында жүргенде түрлі мәдени шараларға, квн ойындарына белсене атсалысып, өнер көрсете бастадық. Мектепті бітіргеннен кейін арада біраз үзіліс болды. 2015 жылы қайта қолға алып, Жаңақорған командасын жасақтадық. Сол жылы Астана маусымашар ойынына бардық. 2016 жылы Алматы лигасында, 2017 жылы қайтадан Астана лигасында ойнап, Прьемер лиганың чемпионы атандық. 2018 жылдан бастап 2021 жылға дейін жоғарғы лиганың финалына көтерілдік.