Медиация тараптарды татуластырды
Жаңақорған ауданында «Медиация туралы» Заңның қолдану аясының кеңейгенін көруге болады.
Медиаторлар жұмысының қажеттілігі мен белсенділігі күннен-күнге артып келеді. Әсіресе араздасқандарды татуластырудың тиімді тәсілдерін жетілдіру арқылы сотқа дейінгі және соттағы бітімгершілік процесін жүзеге асыруда медиация қызметі керек.
Отбасыларда жиі орын алатын ерлі-зайыптылар арасындағы араздықты, отбасының басқа да мүшелері арасындағы дау-дамайды оңтайлы шешуде медиация қызметінің ықпалы зор.
Бүгінде халықаралық тәжірибеде медиация бітімгершілікке бастайтын ең тиімді тәсіл ретінде танылып отыр.
Сөзіміздің дәлел ретінде, аудандық сотттың өндірісіндегі Қазақстан Республикасы ӘҚБтК-нің 73-бабының 1-бөлігімен азамат М.-ға қатысты әкімшілік құқық бұзушылық туралы іс қаралды.
Азамат М. алкогольді масаң күйде Жаңақорған ауданы, Төменарық ауылында тұрғын жайда әкесі Е.-ге сыйламаушылық танытып, былапыт сөйлеп, отбасы-тұрмыстық қатынастар аясындағы құқыққа қарсы әрекет жасаған.
Сотта азамат М. өз кінәсін мойындап, әкесі Е.-мен қазіргі кезде жәбірленушімен медиация тәртібімен татуласқанын көрсетті.
Аудандық соттың қаулысымен құқық бұзушы М.-ға қатысты Қазақстан Республикасы ӘҚБтК-нің 73-бабының 1-бөлігімен қозғалған әкімшілік құқық бұзушылық туралы іс жәбірленушімен медиация тәртібімен татуласуына байланысты тоқтатылып, ол жауаптылықтан босатылды.
Жаңақорған аудандық сотының баспасөз қызметі.
