Азаматтардың хабардар болуы 33 млн теңге бюджет қаражатын тиімсіз пайдаланудың алдын алды

Қазіргі таңда Агенттік бюджеттік ақпаратқа қол жетімділікті қамтамасыз ету мақсатында азаматтық қоғам институттарының өкілдерімен бірлесіп бұдан бұрын іске қосылған «Ашық бюджет» жобасы аясында шаралар кешенін жүзеге асыруда.
Жобаның мақсаты азаматтық қоғам өкілдеріне бюджет қаражатын жоспарлау мен жұмсауда қоғамдық сараптама жүргізу мәселелерінде, сондай-ақ жеке қаржыны сауатты жоспарлауда жәрдемдесу.
Осылайша, жоба іске қосылған сәттен бастап Ашық бюджеттердің интерактивті картасы арқылы қоғамдық бақылаушылар тауарларды, жұмыстар мен қызметтерді шекті деңгейінен жоғары құны бойынша сатып алуды анықтап, олардың іске асырылуын тоқтатты.
Нәтижесінде, еліміздің 8 өңірінде үнемделген қаражат сомасы шамамен 33 млн теңгені құрады.
Бюджет қаражатының тиімсіз пайдаланылуын анықтаудың жекелеген кей істері Агенттіктің аумақтық департаменттерінің әлеуметтік желілердегі ресми парақшаларында тікелей эфирлер барысында талдануда.
Жалпы, мемлекеттік органдар өкілдері, тәжірибелі заңгерлер мен жұртшылықтан құрылған 25-тен астам сарапшының қатысуымен бюджет қаражатын жұмсау тиімділігінің мониторингі және дербес қаржылық сауаттылықты арттыру бойынша 50 онлайн-кеңес өтті.
Сонымен қатар, бюджет қаражатының жұмсалуына қоғамдық сараптама жүргізуге азаматтарды кеңінен тарту үшін өңірлік кәсіпкерлер палатасы, қоғамдық кеңес, кәсіподақ ұйымдары, «NurOtan» партиясы және Арнайы мониторингтік топтардың өкілдерінен жалпы саны 83 белсенді азамат бастаған «Ашық бюджет» өңірлік клубтары құрылды.
Әрбір ниет білдіруші Ашық бюджеттердің интерактивті картасы арқылы (publicbudget.kz) бюджет қаражатының мақсатқа сай пайдаланылуына қоғамдық сараптама жүргізуге тікелей қатысып, елдегі жемқорлық деңгейін төмендетуге өз үлесін қоса алады.