Мониторинг: дәрі-дәрмекті қымбат сатқандар анықталды

Жаңақорған ауданы прокуратурасының бастамасымен қадағалау аумағында дәрі-дәрмектерді негізсіз қымбаттатып сатқандарды анықтау және жауапқа тарту мақсатында аудандық полиция бөлімі, жергілікті атқарушы орган және «Nur Otan» партиясы өкілдерінің қатысуымен мониторингтік топ құрылды.
Мониторинг жүргізу барысында Жаңақорған кентіндегі екі дәріханада дәрілік заттардың қымбат бағамен сатылғаны анықталды. Яғни Жаңақорған кентіндегі дәріхананың бірінде «Супрастин» препаратының шекті бағасы – 1731,25 теңге бола тұра 2000 теңгеден сатылғаны белгілі болды.
Екінші дәріханада «Азитро» дәрілік препаратының шекті бағасы 4041,37 теңге бола тұра 4200 теңгеден, яғни 158,63 теңгеге қымбат бағамен сатылғаны анықталды.
Осы орайда, аталған деректер аудандық полиция бөлімінің ақпараттарды есепке алу кітабына тіркеліп, жинақталған іс-құжаттар шешім қабылдау үшін құзырлы органға жолданды.
Аудандық прокуратураның бастамасымен құрылған мониторингтік топ жұмысын жалғастырып, дәрілік заттардың бағасын заңсыз өсірмеуді бақылайтын болады.

Жұпар ШАЙМЕРДЕНОВА