Тәуелсіздік құрдасы
Бүгінде тәуелсіздіктің төл құрдастары орда бұзар отыз жасқа келіп, елдің дамуына өз үлестерін қосуда. Олар қоғамдық өмірдің әр саласында табысты еңбек етуде. Айдар Әбенов болса спорт саласында өзіндік ізі бар азамат.
Бастауыш сыныпта оқып жүргенінде күрес залына барып, кілемде аунап-ойнап, спортшы болуға бекінеді. Оның ынта-ықыласы алдамады. Бірнеше жылдың ішінде еркін күрестің қыр-сырын меңгеріп, бапкерлерінің көзіне түсіп, аудандық, облыстық деңгейдегі турнирлерде дараланады. Сөйтіп, өзінің өмірін спортпен байланыстырып, жоғары білімін А.Яссауи атындағы халықаралық қазақ-түрік университетінде алады. Онда бапкерлік өнерге маманданады.
2011 жылы Жалағаш ауданында еңбек жолын бастаса, 2018 жылы өзі жаттығып, шыңдалған №8 спорт мектебінде жаттықтырушы қызметін жалғастырады.
Жасөспірім спортшылардың техникалық, тактикалық тұрғыда шыңдап, жетістікке жетелеп жүр. Мақсаты – қазақ күресінің аңызына айналған Жақсылық Үшкемпіров пен Дәулет Тұрлыханов сынды жігерлі, намысты «чемпион рухты» балуандар дайындау.
– Жаңақорғанда талантты, талапты жасөспірімдер көп. Сондай ұландарды тауып, оларды спортқа баулып, көрген-білгенімді үйрету азаматтық борышым деп білемін. Біздің ауданнан Олимпиада ойындарында өнер көрсеткен Жасұлан Мұхтарбекұлы, Дәулет Ниязбеков, Ғалымжан Өсербаев сында балуандар шықты. Солардың ізін жалғайтын спортшылар дайындау біздің негізгі міндетіміз, – дейді ол.
Білікті бапкерден тәлім алатын жасөспірімдер арасында «чемпиондық рухымен» ерекшеленіп жүргендер де аз емес. Мәселен, Әбдішүкір Ерасыл еркін күрестен Қазақстан чемпионатында үздік үштіктен көрінді. Бану Төлеген елдің мықтыларын анықтайтын чемпионатта күміс медальды мойнына тақты. Батыржан Жұматов облыс біріншілігінің жеңімпазы, республикалық турнилердің жүлдегері.
– Тәуелсіздіктің төл құрдасы болғанымды мақтан етемін, әрі өз-өзімді кәсіби шыңдап, чемпиондар тәрбиелеп, елімнің спорттық державаға айналуына үлес қосқым келеді, – дейді кейіпкеріміз.
Мақсатшыл Айдардың нәтижелі жұмысына әріптестері де тәнті.
Рауза КӨБЕГЕНҚЫЗЫ
