ӨЗГЕРІСТЕР МЕН ТОЛЫҚТЫРУЛАР

Бүгінде Қазақстан Республикасының кейбір заңнамалық актілеріне діни қызмет және діни бірлестіктер мәселелері бойынша өзгерістер мен толықтырулар енгізу туралы заң жобасы дайындалып жатыр. Заң жобасының  мақсаты дін саласындағы заңнаманы жетілдіру болып табылады. Ал заң жобасының негізіне дін саласындағы мемлекеттік саясатының 2017-2020 жылдарға арналған тұжырымдамасы жатыр.
Бүгінде діннің атын жамылып қоғамдық құрылысты бұзуға әкелетін әрекеттер жылдан жылға ұлғаю үстінде. Қазақстанда да бұл негативті тенденция 2011 жылдан бастап күшейді. Аталмыш заң жобасы осындай тенденциялардың алдын-алу көздейді.
Заң жобасындағы жаңа нормалардың бірі ретінде шетелде діни білім алу шарттарының енгізілуін атауға болады. Бұл норма болашақ дін қызметкерлерінің алдымен Қазақстанда білім алып, содан кейін шетелде діни білімін тереңдету үшін баруға болатынын білдіреді. Болашақта осы норма екі мәселені шешетін болады: отандық діни мектептің дамуы мен деструктивті идеялардың енуіне тосқауыл болу.
Бірінші мәселенің шешілуі Қазақстандық мәдениетті бойына сіңірген, қоғамның нормаларын білетін және мойынсұнатын, қазақтың ежелгі дәстүрлі исламын толықтай түсінетін азаматтардың білім алуына, олардың ел игілігіне қызмет етуіне өз үлесін қосатын болады. Ал екіншісі алдыңғыдан туындайды. Яғни, мемлекеттің, қоғамның игілігін көрген, дәстүрлі исламның канондарына құныққан азаматтар деструктивті идеялардың енуіне жол бермей, оған қарсы қызмет жасауда белсенді болары анық.