СТУДЕНТТЕРГЕ ТЕЛЕФОН МЕН ИНТЕРНЕТ ҚОЛДАНУҒА ТЫЙЫМ САЛЫНДЫ
Түркіменстанда қысқы демалыс кезінде студенттерден "мобильді телефон мен интернет қолданбаймыз" деген мәтіндегі қолхат алынған. Сонымен бірге, жастар оқу орнының басшылығына "тойға бармаймыз" деп уәде беріп кеткен, – деп жазады Centralasian.org.
Бұл туралы Азаттықтың түркімен қызметіне елдегі бірнеше жоғары оқу орындарының студенттері мен оқытушылары мәлімдепті.
– Мұндай қолхатты студенттерден 25 қаңтарда жаздыртып алды. ЖОО басшылары демалыс кезінде студенттерге өздерін тәртіпті ұстауды, телефонмен сөйлеспеуді, интернет қолданбауды және тойларға бармауды тапсырған, – деп хабарлады Ашхабадтағы тілші.
Бірнеше күн бұрын ЖОО студенттері оқытушыларының демалысқа ауылына бару үшін такси қызметін пайдаланбауды бұйырғанын айтқан. Тіпті, демалыстан келгеннен кейін жол билетінің көшірмесін деканатқа тапсыруды талап еткен екен.
