Жаңақорған аудандық сотында электронды нысанда қылмыстық іс қаралды
![](/uploads/posts/2018-11/medium/1541568126_1.jpg)
Жаңақорған аудандық сотында Қазақстан Республикасы ҚК-нің 346-бабының 1-бөлігімен сотталушы И. қатысты қылмыстық іс электронды нысанда қаралды.
Іс құжаттарымен анықталғандай, сотталушы И., Жаңақорған аудандық сотының 25 шілде 2018 жылғы қаулысымен 3 жыл мерзімге көлік құралын басқару құқығынан айырылған адам бола тұра, 21 қыркүйек 2018 жылы Жаңақорған кенті, Иманов, Қорған тоғай көшесінің бойында автокөлікті мас күйінде басқарған.
Алкогольмен масаю күйін анықтау туралы медициналық қорытындысына сәйкес, сотталушы И., «жеңіл» дәрежелі мас күйінде болғаны анықталған.
Сотта, сотталушы И., кінәсін мойындап, істеген әрекетіне өкінетінін, алдағы уақытта ондай әрекеттерге бармайтынын көрсетіп, жеңіл жаза қолдануды сұрады.
Сот үкімімен сотталушы И., Қазақстан Республикасы ҚК-нің 346-бабының 1-бөлігімен кінәлі деп танылып, көлік басқаруға байланысты қызметпен айналысу құқығынан 3 жыл мерзімге айырыла отырып, 100 сағатқа қоғамдық жұмыстарға тартылды.
Үкім заңды күшіне енбеген.
Қайнар: Жаңақорған аудандық сотының баспасөз қызметі
Пікір 1